小菲菲俠自煮樂
早輪行經街市一檔雜貨鋪既時候，剛好撞到雜貨舖有新鮮到貨既蜆肉干，睇到好靚，即刻買佐半斤，都係十四蚊咋。
半斤已經可以用二三次啦，因為浸佐水之后會發大少少。
俾過電話問阿媽蜆肉點樣處理，原來需要先浸一浸水，然后將蜆頭果堆黑色既野取出黎，然后過多幾次水，將蜆肉入邊既沙儘量衝出黎。
然后拖一拖水備用。
睇下，我整得幾乾淨。。。
整佐依味「蜆公主辣舞蘿蔔王子」，其實即係辣椒蜆肉炒菜脯。
作法好簡單，落油爆香青椒，然后倒入蜆肉同蘿蔔干爆出香味。
最后落蠔油同少少糖調味即可。。。。
蜆肉同蠔油既味好襯，少少既辣意，咬起上黎帶有菜脯脆卜卜既口感，非常之香口惹味。
愛黎伴粥送飯，都絕對一流。。。。
另一味「蝦將棒打豬八怪」就更加簡單啦。
先用少少少少油，爆干身切成薄片既五花腩，然后將肉撈起，爆五花腩既時候，會出好多油，咁用返依D油，爆香蝦醬，倒入豆角炒軟，最后倒入五花腩略略炒一炒既可。。。。
又係勁好送飯既餸菜。。。。
兩味好適合夏季無乜胃口之時食既小菜。。。
因為煮餸我好鐘意用猛火烹製，所以屋企果個平底易潔鑊用佐年半之后，雖然使用過程一直好小心，但都係出現佐花痕，為佐安全起見，唯有將佢扔佐。
換佐一個不銹鋼平底鑊，28CM大，買鑊我鐘意選購較為大身果D，因為煎煮野都可以一次落多D嘛。
已經有心理準備，不銹鋼鑊係唔同於易潔鑊咁好使，必定會痴底。
但係第一次試炒飯既時候，真係痴到阿媽都唔認得，痴佐厚厚一層飯焦係度，睇到真係眼都直埋。。。。
點算咧，痴到咁緊要，以后點使啊？但係買返黎先至一日啵，無可能咁快扔佐佢啊，咁即刻嘗試其它烹調方式。
因為買鑊果個姐姐交待話，不銹鋼鑊係要冷鑊落油，咁煎起野上黎先至唔會痴底，但試過咁樣炒飯，真係痴到好緊要。
我炒餸係用生鐵鑊黎炒，咁生鐵鑊我既習慣係熱佐鑊再落油，然后熄細D火再炒，咁就算炒肉都唔會痴底，用耐佐直頭點煎都唔多痴底啦。所以對於依個不銹鋼鑊，我決定轉用自己既方式，熱佐鑊再落油。
先試煎蛋。
等個鑊高火干燒一至二分鐘，感覺到好熱之后，淋油上去（一匙既油，好少好少），熄細火，打個蛋落去，由得個蛋自己煎下，唔好急住翻身。
我心急，煎佐二十幾秒幾后就幫個蛋翻身，真係可以拎到起黎啵。
就算熄細佐火，個鑊都係幾熱下，所以個蛋有少少農農地。而且我翻身太急，所以個蛋總有少少痴佐係個鑊度。
所以下次如果都係煎野，個鑊咁熱，我就索性熄鬼佐火，等個熱力自己慢慢煎到食物表面略熟之后就會唔痴底啦。
煎佐荷包蛋，再試煎蛋皮。
我偷懶，無洗到鑊，直接再熱翻個鑊，落油，熄火，倒蛋液。
原來真係得啵，真係唔痴底啵。。。。
乾淨果度真係唔痴底。。
但係之前煎荷包蛋痴佐少少野係度，果個部位再煎蛋皮既時候，又繼續痴埋。。。不過輕輕一鏟，都鏟到出黎。。
咁用完一輪之后覺得，用不銹鋼鑊其實都可以做到物理唔痴鑊。但係就真係要俾少少耐性去操作羅，唔可以太心急，咁就可以煎到靚靚既野出黎啦。
雖然係煩D，但係點都安全過用易潔鑊，而且一年換一次易潔鑊，個費用都幾勁下，不銹鋼鑊，可以粗用唔使驚整花佢嘛。。。
不過如果平日少整野食既人家，用返易潔鑊，就相對方便D，用不鑊鋼鑊始終需要少少技巧先至可以煮到靚靚食物。。。。
下次買D魚啊雞扒啊返黎再試過個不鑊鋼pan啦。
用佐幾次咋，個鑊底已經變佐色，無咁靚啦。。。
似乎好耐無食過咖喱咁，依日買佐一隻走地雞黎整咖喱。
因為食咖喱雞，最好食雞味濃D，有咬感D果種雞肉先至好味。
所以點解我唔鐘意係出邊食咖喱雞？就係因為好多煮咖喱既舖頭都選用價格較平既冰鮮雞黎整，食落好似咬泡沫咁，鬆泡泡之餘，雞味更加欠奉~~
整咖喱雞材料好簡單，洋蔥一隻（選紫色依種洋蔥會香甜D架），薯仔三隻，雞一隻斬件。
睇下自己屋企整好既咖喱醬。
係舅母整俾我架，整佐好大一份，總細心幫我分埋一包包，一次一包一隻雞既份量。
係生既咖喱料，所以食用之前需要先用油爆香D材料，一碗仔整一隻雞，咁D味先至夠晒濃。
咖喱醬既材料有「香茅、紅蔥頭、大紅色辣椒、新鮮黃薑、芫莤籽炒香、少少蒜頭、石栗、沙倫葉」
所有材料舂碎撈埋一起，食用之前用油爆香就係香香既咖喱膽啦。
作法就好簡單啦，先爆香咖喱膽，然后倒入洋蔥同雞塊入去翻炒，加薯仔落去，落鹽，糖調味。
然后加水，我鐘意食無咁腍既雞肉，所以水落得唔係非常多，好快好易煮熟架D雞肉，最緊要係個薯仔要煮熟，所以薯仔我一早就落埋落去。阿媽為佐食既口感更好，會先用油炸過薯仔，咁雞差唔多煮好先至落薯仔。
我懶得依個步驟，就直接將薯仔擺埋落去一起煮。
睇落好似好紅好辣咁，其實用既係唔辣既紅椒黎。。。。
只係要個色水夠靚。。。。
係咁煮煮，煮二十幾到三十分鐘就煮好啦，熄火之前加少少椰汁，個味會再香D，但係椰汁唔好太早落，因為椰汁久煮會出油，所以最好都係熄火前再加椰汁落去，比較健康好味。
睇下，好夠味既一大碗咖喱雞。
我提早整架，咁整好之後浸住佢，夜晚食之前再翻熱佢，咁個咖喱味先至最入味。。。。。
一隻雞整出黎真係好大一份，一餐食唔晒，分成兩份，慢慢嘆~~
其實我就比較鐘意咖喱配白飯，但係強哥就好鐘意配薄餅。
咁除佐一大煲白飯，額外再整多二張薄餅俾佢過下口癮啦。
薄餅材料：
1，普通中筋面粉100克、鹽1克、滾水60克、冷水20克、豬油一匙
2，將所有材料撈埋，然后倒入滾水，快速將麵粉同滾水撈成雪花狀
3，加入剩餘凍水，將面團搓成一個光滑面團，醒半個鐘。
4，將面團分成兩份，將每個面團仔搓成一大片薄面皮，係面皮上涂上薄薄一層油。
5，然后好似風琴咁既樣，重重摺疊起黎。
6，摺疊好既面再拉一拉長，然后好似下圖咁，盤個圈，再將餅壓扁，然后上平底鑊，落少少油，慢火煎熟。。。
睇下，自家整既薄餅，雖然無專業既咁靚，但係個口感好鬆軟，好有面粉既香味，配以咖喱汁，真係無得頂啊。。。。
額外炒多一個馬拉盞炒通菜，依一餐，完美~~~
阿娘包佐D粽羅黎俾我食，因為阿娘係晏朝先至過黎，預先又無話俾我知，所以都無買到咩餸，更加無煲到湯。
係咁易炒佐幾個餸大家食。
不過自己阿娘，當然唔會計較咁多啦，最緊要係同個女食飯，就好開心架啦。
肉鬆炒黃豆芽。
青椒炒牛肉。
因為整薯菜個手指拉會變黑，所以基本上我都唔鐘意整黎食，咁阿娘預先係屋企幫我整洗乾淨帶過黎俾我，落鑊炒就得。
加佐D酸筍絲落去一起炒，好惹味。
有朋友送佐幾包廣西既酸筍絲俾我，平日都唔捨得食，因為係香港都買唔到，所以更見矜貴。
我同阿娘都好鐘意咁樣食架。
加埋阿娘整佐一大舊既甜肉俾我，三個人，四個餸。。。
有娘的孩子似個寶。。。。。
睇下，阿娘新鮮滾熱辣剛剛整好既粽。。。。
依輪既早餐都係佢啦。。。。
----------------------------------------------
因為蝸居淺窄，而且打算要BB，所以一路都無養過寵物。
唯一跟住我好多年既係依條魚仔。
養佐接近四年啦。。。。
好知性架，好似狗仔咁，人一走近個魚缸佢就開始游埋過黎，對住你係咁搖個尾，好趣致。。。。
初初買返黎果時就係好簡單既一條魚仔，得個幼童尾指咁大，后黎越養越大，唔知點解，舊年開始，阿魚仔個頭開始生佐D透明既泡泡出黎，睇落似個壽星公咁。。。。
得一條魚仔，所以細細一個魚缸仔，我都無落氧氣，凈係每日餵佢食兩次魚糖。
係好普通好普通既魚仔黎咋，唔經唔覺，都養佐接近四年羅，阿魚仔真係好野~~~
笑話一則------
兩個成年男子因海上意外，漂流至一處光突突地孤島，黎到依一日，島上可食之物皆已食盡，別無它計，兩位男士經商議之后決定，切除身上多餘之物以作裹腹之用。
想來思去，最終將切除之物定作係於生存一事影響至細既男性某處。
決定之后，兩名男子背對而座，準備揮刀自宮。
只見其中一名男子未曾自宮先行自瀆
並口中念念有詞：「搓大D，可以食多D」！！~~
---------------------------------------------------------------------
依排見自已無乜精神氣力，總有少少氣喘，無端端標冷汗，腰少少酸軟，加埋有D夜尿，覺得自己應該係腎有少少虛弱，咁除佐飲多D水，再配以食多D補腎既食物。譬如用杞子衝水飲，食多D新鮮淮山，食多D對腎猶其好既韭菜，都算有少少食療既作用。
依日就買佐D韭菜切碎碎同蛋煎一個蛋餅食。
作法好簡單，先將蛋打到發起，基本上煎蛋餅之前我都會先將蛋打到發起少少，再撈埋D材料入去煎，咁樣既作用係煎既時候除佐真係可以變大D，總易定型，唔知點解，次次我打發個雞蛋既時候，就會腍到上邊果個笑話。
打到發起既雞蛋再撈埋切好既韭菜同埋少少免治豬肉，落少少鹽較味，然后倒落平底鑊煎至定型，喜歡香口既可以煎至略為焦黃。
煎韭菜蛋餅，就咁簡單。
韭菜一經加熱煎熟之后，同蛋既香味加埋一起，真係好香好香。。。。
切開個邊睇下，外邊香脆，內里鬆口。
三隻細細個既雞蛋，就煎到一碟大大份既韭菜煎蛋。
發大佐再煎，真係可以食多D架。。。。
另外再滾多一個粟米魚肚羹。
整多一個芽菜炒豬肉鬆，唔記得買豆卜，如果唔係，芽菜炒豆卜，總好味。。。。
依餐真係好平，買佐八蚊瘦肉剁碎，二蚊韭菜，三蚊芽菜，加埋少少屋企長備既魚肚，十幾蚊咋，就煮到二餸一湯啦。。。。
雖然都係好平價既小菜，不過家常小菜都可以好好味，睇下食完既戰場，幾俾面。。。。。
