創意雞扎+金鉤粉絲炒紹菜+菜干湯

上次燒烤唔記得醃雞扒，尋日阿娘黎我度玩，夜晚就用燒烤果種醃料醃佐一舊雞扒，再俾少少創意，係外形上做小小改造~

首先講下醃料---

材料有：

1、黃姜粉 2、芫莤籽粉 3、椰粉 4、香茅與幹蔥碎 5、生油 6、生老抽 7、黑砂糖

所有醃料搞勻之后，將雞扒同醃料撈好，醃的時間越長越好，我提早佐一晚開始醃定佢啦，咁真係乜味都足晒~~

跟住擺一條腸仔係入邊~~

搵綿繩，將雞扒捆紮成一舊。

最后入焗爐二百度火焗佐二十五分鐘度。

焗好之后，切成片片上碟，伴以「加多加多」醬同食。

哈，真係好好味啊~~

D香料一焗就變得非常非常之極，入邊我加佐一條腸仔，個雞皮焗到脆一脆，食起上黎，無論係口感或者味道，都非常豐富精彩~~

加埋個「加多加多」醬，極品~~

尋日好想食粉絲，早幾日係惠康以$3.8蚊買佐一條紹菜一直未煮黎食,咁就索性將二者煮埋一碟啦...

1,先用薑絲、蒜蓉、金鉤（即係蝦米啦）做味料

2，粉絲一扎浸軟

3，紹菜切好

作法：

先用油爆香所有味料，跟住倒入紹菜炒軟，加少少雞湯落去，加少少鹽調味，倒入粉絲炒至收汁。

因為粉絲好會吸水，所以基本上依味菜炒好之后係好干爽的，D粉絲吸收佐高湯同埋紹菜的清甜之后，勁好味。。。阿娘都話D粉絲好好味`~

知道阿娘鐘意飲菜干湯，咁就煲一個菜干湯好啦

買佐一盒大骨，一扎菜干，一斤新鮮白菜。

如果菜干係係街外買番黎的，咁D菜干一定要浸開先至可以清洗乾淨入邊的沙石，不過浸得太耐，D菜干味就浸到淡晒啦。。。

我用既係表姐同事送的自家制的菜干，洗得好乾淨先至晾乾的，所以我只需要浸一浸洗一洗就可以開始煲湯啦。。。

加佐粒半蜜棗，菜干湯幾時都係咁好味啦~~

阿娘整佐兩舊鹵水肉俾我，切埋又係一大碟。。。

全家福`~

今日早餐食佐乜？

好靚的蕉葉糯米卷是也~~

係阿娘整俾我架~~

餡用佐椰絲同埋肉碎與鹽，加埋少少咖喱粉炒到香一香，再包到蒸好的糯米飯度，好似包壽司咁包好一個糯米筒，外層再包上一層芭蕉葉，食之前用平底鑊或者焗爐整返熱佢，咁D芭蕉葉獨有的清香就滲入到糯米度，食起上黎，熱辣辣，香噴噴~~

無得頂啊~~

101站台

早幾日返官塘奶奶度食飯，落佐車隨手影佐幾張相，講佐多年的官塘重建計劃睇怕好快就要上馬，好多舊時建築，以后再難尋返。。。、、

係101站台果度影佐幾張相~

 

 

依幾檔粥粉面檔，平靚正~~

---------------------------------------------------

講返奶奶整既靚餸~

煲佐西洋菜湯，加佐一粒蜜棗，好好味~~

自己浸到的蟹，三隻花蟹，二隻青蟹，一隻龍蝦~~

我至愛至惹味的南乳蓮藕燜豬手`~

食唔晒果D我全部打包拎返黎，第二日再一截蓮藕落去，又係一大煲~

生炒骨，正`~

果皮蒸泥猛`

原以為四叔會返黎食飯，點知果晚得我同阿強返去，成台餸，食得飽飽。。。。

餸頭餸尾之粟米魚肚羹~

今日一早奶奶打來電話，說買到好靚的豬手，明天做蓮藕燜豬手，再煲一個西洋菜湯炒個菜，問我們明天回不回去吃飯。
一直覺得奶奶是個非常識大體的長輩，即便她已有自己壹套計劃，也從來不會強求晚輩做任何事情，一切均由我們自己決定，像是她自小教強哥“不要先去衡量別人給了自己什麽，最重要是自己做足本份內的事情，無愧自己就已經足夠”，奶奶自己，更是一直的身體力行，因此，更值得尊重。

強哥有一個長輩，因著上一輩的恩怨，自細對強哥的態度不過爾爾，逢年過節總會有訪親探友之事，遇上了，強哥總是先行奉上一個大利是，不甚解之下替強哥大呼不值，反而要強哥掉頭開解“總是長輩，不用去理別人是怎樣對待自己，我做好自己做晚輩本份內應該做的事情就足夠了”

同強哥在某點上極其相似，極少理會別人的眼光，不過在於胸襟一事，尚有極大的進步空間，需要向強哥學習。

---------------------------------
明天回去吃飯，那今天先清理掉雪櫃多余的食品再說吧。沒有外出買菜，雪櫃裏的料頭料角加以重組配搭，足夠一餐。

早幾日燒烤之後剩余的一條茄子，幾條排骨，試著搭在一起煮，可惜排骨已醃過味道，還是單獨烤香了才好吃，加了醬油與蒜蓉配上茄子同燜，這樣的配搭，只能叫勉強吃得入口，好吃，真是稱不上。。。

唔係幾好食，食譜就唔講啦~~

另一個係剩低雜七雜八D菜的邊角料，外加區區四片的肥牛，因為肥牛太少，配料上我就切晒剩低的一個細半椰菜，剩下的四分一洋蔥，半條甘筍，一扎芫莤。
配料多D，睇落份量沒咁單薄~~

落佐蠔油同孜然粉，幾似孜然羊肉咁既味道添~~

另外燒烤剩低一條粟米，剝出黎之后再衝碎，煮個粟米羹。

魚肚，當然係用砂爆魚肚，見過一D好平既魚肚，細看之下先發覺，係無良商家用豬皮代替，因為豬皮炸好之後同炒熟嘅魚肚有幾分相似，都係卷埋一個圈，所以依家買乜野都要練就一副金睛火眼先至得。

大概講下魚肚嘅選擇，正宗水上人家處理魚肚，會燒熱一煲嘅砂，將新鮮魚肚擺入砂堆入邊慢慢炒熟，魚肚加熱熟佐之後會變脹變大，口感類似炸豬皮，但係另有一種豬皮所無嘅鮮香味，選擇嘅時候要聞下，如果唔係用砂炒熟而係貪快用油炸熟嘅魚肚，會有一陣油膩味，擺得耐佐會好臭，靚嘅魚肚應該係用砂炒熟，先至可以擺得耐D同埋好味D。

為避免買錯豬皮冒充嘅魚肚，選擇嘅時候，要睇下魚肚是否一個完整嘅筒狀，如果係豬皮，係會睇到一個分開嘅口。

魚肚一般係海味舖都會有售，屬於干貨一類。

剁佐少少五花腩，打個蛋落去，一煲好好味既魚肚粟米羹~~

餸頭餸尾，都可以整到兩餸一湯，吝嗇煮婦好本事可見一斑~~

上次俾電話舅母，問佢點整年糕，點知過佐無幾日，舅母竟然自己整佐一底年糕過黎俾我，依個舅母，真係好錫我。。。。

早餐整佐一個蛋煎年糕，正`~~

大美督燒烤行

因為熱的時候太長，已經好耐無戶外活動，多數時間都係以屋企為主要活動範圍。

趁住依家天氣涼涼地，陽光又好，上個星期六同強哥約佐阿娘去大美督燒烤場燒烤。

因為趕係一點鐘收工潮之前就入到去，個場仲有好多吉爐可供選擇，好好彩搵到一個依山傍水的好位，舉頭之上，既有藍天白雲，更有綠樹濃蔭，底下紅色衫者，正是娘親是也~~

唔鐘意去提供食物的自助式燒烤場，因為實在無辦法接受果D燒烤場提供的咁粗糙的食物味道，燒野食，我係有要求的~~

因為得三個人仔去燒0野食，需要準備的材料唔係好多，我簡單的買佐D豬梅頭肉切片，整印式沙嗲食。

主要醃料有「干蔥頭，香茅切粒，芫莤籽粉，黃薑粉，生老抽，黑糖」

紅蔥頭同埋香茅切佐粒之后要衝碎

紅蔥頭同埋香茅切佐粒之后要衝碎，睇下我個衝仔，香港我凈係係印尼商店見過有售，要六十至八十蚊一個，我就覺得幾貴啦，所以舊年係深圳搬佐一個返黎，材料大家都係用的麻石黎整，個樣接近程度有90%，功能100%相同，而售價，盛惠人民幣「八蚊雞」，哈哈，重重都搬返黎啦。。。。

平日無用0既時候擺響大廳度隨意咁一擺，就已經係好靚的一景，一物多用，何樂不為~~

醃好D材料唔夠架，我另外整佐幾味醬料帶備：

1，係老抽加埋黑糖，愛黎擦係肉類面度，增加醬香同埋色水，而且甜甜香香，較之蜜糖，勝出無數。

2，「加多加多」醬，係印尼商店買返黎開水就用得，係用花生同埋數十種香料整成，撈係肉或者菜度都會香好多。

3，自己整佐D豆豉蒜蓉醬，打算同茄子烤黎食。

因為切佐D五花肉，帶佐D青椒仔，所以另外帶佐依樽燒肉汁去擦係五花肉度，只可惜最后因為太飽，個五花肉都係無食到！~

唔知買乜送既一個音箱仔，個聲係劣D，都帶埋去，勝在有少少聲響，增加下氣氛，幾好架~~

細個時阿娘照顧得我多啦，依家當然換轉我大個女，照顧返阿娘啦，所以唔使阿媽出手，我同強哥二公婆一個透火一個扇火，好快就起好個爐啦~~

最先落場的係香噴噴的印式豬肉串同埋雞亦同埋金沙骨。

另外擺佐幾個無咁易熟的粟米同埋蕃薯。

絕對唔係講笑，香茅同干蔥的味道經炭火一烘，D香味一出黎，真係香飄千里。。。。

周圍都聽到有人係度細細聲問「唔知燒乜咧，咁鬼香0既」

哈哈哈。。。睇黎以后搵唔到野食羅，我都可以嘗試開返間燒烤檔燒野食啵。。。

凈係個香味，應該都可以吸引到街人駐足啦~~

豬肉串最先烤熟，濃濃的異域風味，經炭火慢慢烤熟，外脆內嫩，色澤金黃誘人，食之前再落少少加多加多醬，強哥食落口之后滿足到眯起雙眼久久發唔出聲音，足矣~~

先奉上二串俾阿娘先，再配埋一個燒到香香軟軟的餐包仔，阿娘神情同樣滿足晒~~~

 

 

我0既興趣係燒的過程，唔介意全程服侍我至愛的家人，等阿娘同強哥慢慢食啦，我繼續燒野俾佢D~~

燒魚蛋同雞蛋~~

擦佐少少甜豉油，正~~

買佐幾件牛仔骨，乜都無需要醃，直接擺上爐燒。

燒到咁上下羅，擦D甜豉油，我準備佐D切好片的檸檬，燒到七成熟，中間帶有少少粉紅色果陣時已經好靚，食之前擠D檸檬汁上去，又香又嫩，正~~

食佐一輪肉之后，阿娘切生果俾我D食，俾個胃透下氣~~

睇到相先至發覺，阿娘的手唔知幾時走出好多斑斑，而且褶皺亦都唔吝嗇咁佈滿手背，睇落，真係好心痛。

如果家父亦都在生，相信阿娘今日會開心好多。

當年就係咁樣一雙大手照顧我直至成人，唔經唔覺，雙手已經變得如此蒼老，所以更加應該趁依家自己總可以，要對阿娘好D，再好D。。。。

樹欲靜，而風不止，子欲養。。。

我知架我知架。。。。所以依家我大個女啦，盡自己能力，對阿娘好D再好D。。。

底下依塊睇得出係乜野嗎？

哈，係舅媽整俾我既年糕啊。。。

切佐幾塊出黎，擺係網度慢慢燒到表面脹起，里邊已經好軟，甜甜地，香香地，脆脆地，軟軟地，勁好味~~

切佐個蕃薯出黎，原黎未夠熟啵，又擺返繼續燒。。。

出黎燒野食點可以無強哥至愛的羊架啊。。。

又係乜都無需要醃，直接擺上個網度

 

個肥脂一遇火就會自己融晒，D油一滴落個炭火度，即刻竄起一個大火舌出黎，驚驚啊，強哥，驚驚嗚。。。。（我好識扮0野架，時不時扮下天真可愛嬌弱狀，等強哥大男人情緒得以無限滿足）

烤好啦。。。。洒少少孜然辣椒粉同埋幼鹽，炭香出黎，果然係靈謝不同的~~

后邊D粟米都係同樣落佐孜然同埋辣椒粉，好好味~~

雞亦除佐醃佐料果D，另外有一部份係無醃野的，直接擺上網，擦佐甜豉油之后，洒上孜然同埋辣椒粉，都係咁好味架~

食到咁上下，已經好飽好飽，帶去的茄子同五花肉根本就已經食唔落，最后清晒D少少食物，可以收爐返歸啦。。。

一場黎到，順便走埋去水庫行行下，睇下日落，嘩，真係靚到閉啊，太陽伯伯收工啦，我D都好滿足咁回家啦。。。

 

依一日真係好開心，以后得閒要多D約阿娘出黎行行下先得。。。