剩餘面包大改造---煎面包餅

一般的街坊餅鋪會有半磅裝的方包出售，一包大約四件左右，滿足小家庭一餐的需要，但是在很多地方都不會有如此貼心的包裝，好似超市所售的方包，多以六到十件包裝，小家庭或是單身人士則未必能夠在一二天之內食完，隔佐一夜的方包，無論口感或味道都絕對的差強人意，這時真是棄之可惜，食之無奈~~~

另外，吃凈的面包無論如何，唔好擺入雪櫃裏，因為雪櫃會吸收面包裏的水份，擺響雪櫃一晚的面包，會變得又幹又硬，加大難吃的力度，所以面包的存放，應該處於室溫當中，會更恰當。

強嫂屋企也不例外，經常都會有隔佐二天的面包尚未食完的結果都係棄之不用，雖然浪費，卻實在是無可奈何之舉。

日前在某檔美食節目上學得一招處理面包頭的方法，將之同樣套用於隔佐夜的面包身上，今早試佐效果。。。

成績報告如下~~

1，隔了二夜的面包，即硬且幹，將之撕碎置於容器內~~~

2，加水或者鮮奶將佢化開

3，加蛋、砂糖、面粉、少少油撈勻

4，較到少少「傑傑地」咁既程度

睇下，早餐三寶。。。

面漿+麥皮+咖啡

5，熱鑊落油，倒入面漿慢火煎香

微微焦黃即可~

趁熱擦少少牛油落去~~

原來咁整出黎的餅仔，真係掂咯啵~~

因為加佐面粉，令到個餅仔會有D煙煙韌韌的口感，加佐雞蛋煎香之后都依然可以食到雞蛋的香味，同埋面包本身香香的酵母同奶味，綜合一齊，可以好好味架~~~

以后D面包唔會再浪費啦。。。。

早餐煎面餅+簡易披薩仔

依家物價高企，金融前景又見堪虞，早上係街度食個早餐，閒閒都要二三十蚊一份，依家咁既時勢，慳得一蚊是一蚊嘛。。。所以依家變多佐係屋企整早餐俾相公，等佢舒舒服服食佐餐戰糧，先至開開心心去開始一日的江湖博殺。

依個煎餅仔自細阿媽就係咁整俾我食，依家照搬過黎整俾相公食~~

材料：雞蛋、面粉、椰子粉、黑糖、牛奶、發粉（泡打粉或者酵母粉都可以）

我通常用酵母粉等佢慢慢發酵，提早一晚整定個粉漿，第二日直接從雪櫃羅出黎就煎得。。。

如果趕時間的話，用泡打粉都可以，只不過係我唔多鐘意泡打粉的味道。。。。。。

 

作法：將所有材料撈勻，奶或者清水都可以，唔可以太稀就得啦

發酵完成之后直接入煎PAN度煎熟即可~~

似唔似叮當至鐘意既豆沙餅啊。。。

呵。。。其實個味都好接近架，如果整細舊D，中間再夾一舊豆沙，就完全係出邊賣緊果D所謂「銅鑼燒」啦~~

不過為佐口感上更香口一D，通常我都會擦D花生醬同練奶。。。

 

好好味的一個煎餅仔就完成啦~~

 

-----------------------------------------------------------------------

另一個我經常整黎食的早餐。

買厚切D既方包黎整就最好啦。

可以提早一晚整定D配料，鐘意食乜就準備乜。

我通常就鐘意用「洋蔥、青椒粒、腸仔切片、披薩用芝士」

切好D配料擺係雪櫃，第二朝起身直接羅出黎就用得。

 

舖法好簡單。

1，擦醬汁係底，我鐘意奇妙醬做醬底，或者蕃茄醬都得

2，先舖一層腸仔，再舖一層芝士片

3，跟住再舖一層洋蔥同青椒，繼續又舖多一層腸仔片同芝士

4，入焗爐之前面度再洒一層芝士粉（香D），焗到個面包邊都變脆口，D芝士同腸仔都熟佐，就OK啦~~

（我舖披薩料的步驟係一個整披薩的朋友教咯，先醬汁，后舖片狀肉類同芝士，再放粒狀配料，再擺片狀肉同芝士，再落粒狀配料，最后面再舖多一層芝士，咁樣食起上黎，口感會好D）

入焗爐的時間，衝杯咖啡同麥皮，咁披薩仔焗好羅，D咖啡同麥皮，都剛剛好飲得~~

一份好味又廉宜的早餐，就係咁簡單`~

 

 

早餐速遞---奶醬西多士

 

尋晚買定一包方包，打算今日早餐整奶醬多俾相公食的，點知尋晚睇某美食節目略略提一提起佐西多士，我屋企個大爺即刻話好想食西多士啊。。。

還掂屋企材料都有，今早就滿足下佢，整佐一份俾佢食~`

材料如下圖所示：方包，練乳，花生醬，雞蛋一隻

作法：1，雞蛋將蛋黃同蛋白分開，並且將蛋白略略打發起

 

2，將適量鮮奶同蛋黃勾埋

 

3，擦花生醬同埋練奶係一塊方包度，再用另一塊方包蓋上

 

4，將擦佐醬的方包浸落蛋黃液中

5，落少少油係一個細D既煲仔度，微微火，將方包再擦上打發的蛋白放落去慢火半煎炸至略變焦黃色。。。。

6，最尾先至落打發蛋白的作用係食起上黎都可以食到蛋的香味同口感~~

7，炸好的方包用廚房紙略略吸吸油

8，擦少少練奶調下味~~~

就係咁簡單~~

 

不過實在太油膩~~~

食起上黎，真係有好重的罪惡感~~~

 

效顰版新疆手抓飯+簡易版椒鹽雞脆骨

發覺近年慢慢愛上羊肉果種獨特的騷味，早前食過一次正宗的新疆手抓飯之后一直念念不忘，尋日係凍肉舖見到有紐西蘭的羊仔骨，即刻買番黎又試整一次俾同樣漸漸嗜羊的親愛相公試下~~

作法：羊仔骨解凍之后，撈孜然粉同幼鹽同埋少少生抽入味

 

因為我的電飯煲太細，唯有用個炒肉的煲直接煮完成個過程，所以我選用佐依個砂鍋來煮依次的手抓飯。

1，先落少少油，慢火煎香羊肉，羊肉裏有很多肥脂，自己慢慢會逼出好多羊油，所以一早無需落太多油。
2，然後加入洋蔥與紅蘿蔔（都切粗D，因為要燜煮時間略長）
3，炒到腍軟之後，加入鹽調味，我嫌不夠香，又加佐一大匙的孜然粉，一小匙的花椒增加香味，最後加水略燜。
4，加入米粒，煮熟。。。（如果屋企電飯煲夠大，依個步驟可以直接擺落電飯煲度煮熟更方便，我因為用砂鍋來煮，水落多佐，而且唔識控制火，飯煮得太腍啦。。。失敗呀。。。。）

 

 

煮好之後，加入芫莤調味炒勻即可`~~

羊肉加上各種香料的味道，果個羊騷味，真是香到入肺呀。。。。

個味香係香極，只不過煲飯太腍，食少少已經覺得好「流」，下次我會記得落少D水，煮得個飯硬身D，肯定更加完美。。。。

 

--------------------------------------------------------------------------------------

補番一個之前整過的椒鹽雞脆骨。

係吉之島買佐依樽校好味的椒鹽，個味真係好香，而且都只不過係十幾蚊已經有大大一樽，超值~~

買番黎的脆骨只需要用椒鹽同埋少少鼓油糖醃入味。

本黎係要用焗爐焗的，后黎睇到雪櫃總有少少黃椒同洋蔥要解決，索性改用平底鑊黎整。

因為雞脆骨本身有極多油脂，遇到熱力自然會逼出D油出黎，所以煎的時候只需要凈鑊落骨，乜都唔需再落。

 

煎到咁上下熟之后，加入黃椒同洋蔥猛火爆二下，可以上碟~~

就係咁簡單~~

又見肥豬肉之---芋頭扣肉煲

離家外游佐接近一個月，依幾日先至返到屋企~~~

個心都未收番，依幾日都懶得入廚煮食，暫時先補番之前整過D食物上黎，費事時間一長我又懶得寫，浪費晒D圖片~~

上個月中秋做節，應幾個叔仔的強烈要求，整佐一大煲的芋頭扣肉煲返去滿足幾個大食肉獸~~~

做法：
1，蕒佐好巨型的二舊豬腩肉，先用水灼煮約二十分鐘。
2，蕒芋頭當然係廣西荔溥的芋頭，因為要長時間的蒸煮，所似芋頭不能切得太薄，相對要切厚D。
3，切片後的芋頭要先炸熟，因為熟佐的芋頭先至可以係蒸煮過程中大量吸收D腩內的肥脂，咁樣整出來的芋頭煲吃起來先至會有肥而不膩的感覺。（為免浪費太多油，我用的是半煎炸的方法處理芋頭，即係放一層薄薄地油係個鑊度，慢火煎熟。）

 

4，然後將灼熟的腩肉撈起，用叉係個皮上篤無數個洞洞。跟著再抹一層老抽上色。

5，將上佐色的腩肉擺入焗爐裏，二百度火對著皮直接焗二十幾分鐘，可以清楚的聽到腩肉的皮因為熱力而鼓脹繼而發出皮皮卜卜的聲音。。。

6，跟住就要開始準備最關鍵的醬汁啦。打過電話問佐阿媽，作法就係簡單的“蒜蓉，紹酒，南乳，冰糖，老抽，”
[用蒜蓉加入肉裏成煲野會變得更香，因為南乳本身帶有鹹味，所以只是用老抽起上色的作用，生抽的話會過鹹，至於量的多寡，真是無法量化，根據自己材料的多寡而決定吧）

7，最後將芋頭與扣肉一片片的在步驟6裏的醬汁過一過，均勻地抹上醬汁之後，以一片扣肉一片芋頭的擺法，皮向底咁樣擺放係個容器度，基本上所有過程搞定啦，凈抵的就是蒸啦。。。我用快速煲煲佐大約四十幾分鐘就足夠啦。

望多眼，就係咁樣焗個皮。。。代替傳統炸的步驟~~

自己出佐好多油添，當晚我就用佐依D焗出黎的油炒佐一碟菜，勁好味~~~

總結下成績，我切得過厚，不過好彩係用高速煲來燜，所以煲扣肉真係入口即化，入晒味~~

個個食到停唔以口啊~~

因為加佐少少紹酒，成煲野係惹味的南乳味之下，伴有一陣淡淡若隱若現的酒香味，真係好好味`~

下次最緊要切得D肉同芋頭薄少少，相信會更加完美~~

-----------------------------------------------------------------

果二舊扣肉太巨型，邊邊唔靚果D位切佐少少落黎，第二日剁碎之后又蒸佐一碟梅菜蒸肉餅。。。。

又做一餐~~

通常如果整蒸菜，我都會一次蒸二碟野，可以減少燃料的使用嘛~~

當晚除做肉餅，另外整佐我最拿手的蒜蓉粉絲蒸娃娃菜~~

作法都寫埋俾未整過的朋友睇下。

1，以前我多數會用“李X記”的罐頭蒜蓉，現在自己唔會抗拒剁蒜蓉了，所以就自己剁佐一碗仔的熟蒜蓉，作法係“蒜頭剁碎加雞粉撈勻，落油下鍋，滾油爆香蒜蓉盛起備用”（個味同罐頭果D基本接近，如果得閒，可以整定一大樽擺住都得）

爆香後的蒜蓉再加到蒸菜度用，會香D~~

2，用冷水將粉絲浸軟

3，碟底鋪上一半的娃娃菜，再抹上一層的蒜蓉，跟住再鋪上一層的粉絲，倒少少蒸魚豉油，然後再鋪娃娃菜，鋪上最後一層粉絲同蒜蓉，淋上一些蒸魚豉油。
即可上鑊蒸。

 

一次蒸二碟~~

蒸十五分鐘度，上台之前再整少少滾油淋上個菜面度，食得！

 

一味又清甜又簡單整的蒸菜`~