美味鮮肉大包

整佐好多個大包啊....

全肉大包.....有無罪惡感?

答案係"無"

實在太美味....雖然係自己整嘅,不過都係要贊下自己

"強嫂,你依次真係整得好好味啊....."

 

依次嘅肉餡味道較得好好.

我換佐一隻白酒嚟當料酒俾味,原來唔同嘅料酒真係會有好大嘅分別出嚟嘅味道.

肉就用佐梅頭肉剁碎,三肥七瘦左右嘅比例(目測).

剁好嘅肉,用"白酒,胡椒粉,生粉,糖,豉油,雞粉,大量水"攪至起膠,然後落大量蔥花,少少姜蓉,少少麻油撈勻.

個餡就整好啦.

(強哥話個味道勁似佢係上海食過嘅小籠包嘅味道,咁下次可以自己試下整"灌湯小籠包")

 

我好重手咖,包好大一舊肉餡入去,咁食落先至夠滿足......

 

除佐整包包,想試下無咁多肉會係點.

咁就將一舊面糰搓成薄薄一片,然後抹上一層肉餡.

 

再將佢卷卷卷起,兩頭壓實埋口.

 

包好之後放置五分鍾,就開火蒸18分鍾.

因為個肉餡較大,所以蒸耐啲,確保佢熟透.

 

個個都發得好靚啊....係有一個卷卷,可能我壓得太薄,壓死個酵母添,佢竟然發唔起.....不過依然都好好味WO......

 

睇下剛剛蒸好嘅肉包....

汁鮮美多到流瀉出嚟添啊......

 

大大一碟....夠幾日嘅早餐啦.....

 

切開個卷起嘅包包俾大家睇下,雖然無咁多肉,不過原來都係一樣好好味,無咁多肉,食落包保唔會流......

鮮肉大包,諗起都覺得好好味......

 

 

簡單自製上海年糕

今日朝頭早見到網友"煮一煮嘅自制年糕食譜",覺得又易整又係我鍾意食嘅嘢,咁就即刻開工自己又試下.

覺得自己真係幾強行動力嘅~~~~

我個量米的杯仔細細,剛好俾我試玩下.

咁就一杯糯米粉,一杯粘米粉.

唔理咩容器啦,總之一半一半就得啦.

煮一煮同學嘅食譜係將加佐水嘅粉糰取一部份出嚟再煮過佢,咁我貪方便,直接沖一部份剛剛煲滾嘅滾水入去,用熱力碌熟一部份嘅粉,因為碌熟嘅粉就會產生粘性,咁就易搓個粉糰,同埋蒸好之後口感會軟糯感強啲.

沖佐一部份滾水之後,快速撥一撥,等滾水碌到多啲粉,然後再沖凍水入去,慢慢搓個粉,等佢可以搓到成形.

睇下,就搓成一個光滑嘅粉糰就好啦.

然後就咁擺係室溫下十五分鍾,等佢醒一醒.

跟住揾個碟,擦少少油,將粉糰分成二舊,然後搓成條狀,上鑊隔水蒸二十分鍾.

真係超級簡單嘅一個食譜.....

我未等佢凍哂就切片,切得好醜樣,應試等佢凍佐先好切啲,不過新鮮就咁試食佐幾塊又幾塊,又真係好好味啊....

有我鍾意嘅糯米味......

邊食已經邊肣到好幾種食法啦,以後想食,隨時都可以整到啦.....

真係多謝煮一煮同學咁好嘅食譜推薦.......

我肣愛嚟涼拌都一定好好味姐.....

 

 

住家小菜---上海年糕炒榨菜肉絲、蓮藕燜豬手

買佐一包仔嘅上海年糕。係上海雜貨鋪一般都可以買得到。

先用少少熱水浸一浸到佢腍。

然後用早一日淨返嘅榨菜肉絲，加埋少少小棠菜仔一起炒埋大大一碟。。。。

原來味道好夾，上海年糕獨有軟軟地，糯糯的口感，加上榨菜肉絲的味道，非常地美妙。。。。。

 

悶係屋企幾日悶都悶出病，唔方便行太耐，唯有座車，既然係座車，當然就去佐較遠嘅一間商場，買下心頭好，個人都感覺開心好多。

順便買佐啲餸返嚟，買佐大大舊蓮藕，大大一個豬手，煮佐一味“南乳蓮藕燜豬手”

做法好似我以前寫過，就唔重複了。

不過依次我落佐一細細匙仔五香粉，原來味道會變得香好多。。。。。。

老公真係叻，我一擺上台，佢即刻問我，點解依次整得咁香嘅。。。。。。

叫老公唔准食太多，要分兩餐食，如果唔控制，佢一餐可以同我食哂，點得啊，一餐食哂，好肥架嘛。。。。

兩味餸都咁好味~~~~

－－－－－－－－－－－－－－－－－－－－－－－－－

第二日，淨有半煲豬手，咁再炒多一個菜就得啦。

係菜市有時會見到啲菜好生猛，水汪汪嘅。有啲就乾爭爭，無嚟生氣咁。

如果唔係一餐可以食得哂啲菜嘅，我一定會買果啲乾爭爭嘅菜。

其實所有嘅菜，一浸水就會生猛返啦，果啲睇落水汪汪好新鮮好靚嘅菜，通常 係菜販先浸過水，然後不停地淋水去保持佢嘅新鮮，如果當日買返嚟就食當然就無問題，如果要留返過夜，淋過水嘅菜，擺一晚就會爛啦，反而係果啲無淋過水，睇落無咁靚嘅菜，可以留得二三日都無問題。

好似依盆菜咁，買佐有三日啦，從雪櫃拎出嚟，再浸一浸水，佢即刻變得好新鮮好靚啦。。。。

依次買嘅菜好特別，係好幼好幼嘅小棠菜，得尾指咁粗咋，但係食落好甜好腍，食菜其實真係好舒服 。。。。

隔夜豬手半煲，加埋一碟蒜蓉炒青菜，正`~~

 

 

福無雙至，禍不單行

從來都是福無雙至，禍不單行的。

所以繼腳傷未愈之時，解我一日之煩悶的唯一法寶，自己常用的果台電腦，又突然地失去工作的動力，需即時返廠維修，唯一覺得慶幸的，是原來電腦還在保養期之內，只餘數日時間，即過了保養期，感覺上，無端節省了一筆費用，算是不幸中之小小幸運，應該報以一笑。

生活當中經常地會發生一些無傷大雅的小小災難。

通常這類的小小災難，外人多數都不見得會有額外地精力去幫你記住，例如我數次當街當巷地“撲街”，對成年人而言，多少算是一件頗為尷尬的事情，當事情發生之後，通常我都會以最快地速度爬起之後默默即時離開現場，見到的人至多當下笑上一笑，誰又會認真地記住有這樣一個人在那個時刻發生了那樣一件事情呢。

要讓一件不愉快地事情最快地過去，唯一最有效的作法就是沉默地讓時間將問題帶走。

－－－－－－－－－－－－－－－－－－－－－－－－－

今天聽到一個新聞。港人熟悉的兩位風水師傅，相繼上訴法庭，互控對方言語中的不當對自己造成的影響。

事情緣起一位李姓風水先生，被傳媒報料與家人發生的若干矛盾，本屬家事，卻因身為公眾人物，倒也引得幾日的風波，而後傳媒為增加話題，再去訪問其它的幾位同行意見，其中一位默靚靚女士直言對方EQ欠佳，處理不當，才會引致如許風波。

事過境遷，傳媒已經不再提起如此小事與舊聞，怕是嘗到免費地傳媒宣傳的甜頭，果位李姓先生，竟認真地發出律師信，狀似要幾位曾經發表過言論的同業者發表正式地致歉聲明。未能深究是否同為宣傳之意，該位默靚靚女士，一樣請返律師，要告返李姓先生言辭不當，對她的專業形象造成影響。

－－－－－－－－－－－－－－－－－－－－－－－－－－－

雖然對於一個公眾人物來講，見報率係提升知名度嘅最佳方法，但係將一個對自己只有百害而無一利嘅負面新聞再次放大嚟講，咁就真係一個好蠢嘅方法，再次令人質疑，佢低嘅，又何止係EQ。

無論雙方互相上諸公堂嘅最後結果係如何，對於李姓先生嚟講，由一開始，佢就注定佐係一個輸家，而另一位默靚靚女士，無論結果對佢係好定壞，有一個事實，花一百幾十個侓師費，已經令到全港嘅傳媒，幫佢提升佐知名度，就算擺係其它地方，做為一個年度嘅宣傳費用，都唔止咁多，而且未必有咁好效果，真係一舉多得嘅好事嚟。。。。。。。

聰明人，係唔會做蝕本生意嘅。

 

飯餸齊熟---蒸飯、榨菜蒸肉絲

雪櫃有一舊榨菜買佐都幾耐下未食，咁就叫強哥係肉檔買佐十蚊左右嘅梅頭肉返嚟，整一味又簡單又快速嘅晚餐。

榨菜切條狀，肉都切絲。

榨菜用滾水碌一碌去咸味。

肉絲用油豉油糖酒生粉醃好味。

 

然後將榨菜同肉絲，淋少少麻油，撈勻，舖平係碟面，搞掂。

份量稍多佐少少，留佐一碗仔出嚟，第二日再用。

好簡單，飯先落鑊蒸十分鐘左右，最後再落埋榨菜入去，蒸多十二分鐘左右。

搞掂，飯餸皆熟，開得飯~~

 

好鐘食堅果類零口，所以屋企花生瓜子腰果核桃開心果都一路有貨。

係屋企無無聊聊，腳唔可以多走動，但係手無事嘛，所以又搓面整包包，咁無乜餡，又唔想凈係整饅頭，咁就利用屋企有買有嘅「青島花生」整一個花生餡嘅甜包啦。

將花生仁去衣舂碎。

然後加啲白糖落去，就係一個花生餡啦。。。。。

花生糖包，雖然個樣睇落麻麻，其實味道係非常非常一流㗎，有機會大家一定要試下。