小菲菲俠自煮樂
四弟兩公婆係紅磡廣場開佐間時裝舖。
今日開張大吉，一早挑好時辰正式開張。
同強哥一早起身，過去舖頭，開心下~~~
做為大哥大嫂，要有表示嘅，訂佐個花藍賀一賀佢啲新舖開張，娘係娘啲，不過好意頭，大家開心下咁啦。。。。
間舖整得好靚啊。。。。
阿四嫂係有眼光嘅，睇到啲貨都好靚，走比較成熟OL路線，韓日貨，絕對唔係內地果啲翻版貨可比。
開係「紅磡廣場地庫B88號舖」，若住附近或返工附近嘅朋友，不妨前去選購~~~
幾靚㗎啲衫~~~
開張有燒乳豬食。。。。。
老爺主持大局，揮刀斬豬~~~
動作純熟~~
斬得幾靚。。。。
夠豪，大大一舊~~~
食燒豬，配埋四弟係澳洲帶返嚟嘅靚紅酒~~~
咁先係啊嘛。。。。。
搞完一輪，時間尚早，約埋老爺奶奶樓上「盜香」飲茶。
味道一般之下，不過志在同老人家飲下茶，食物質素無乜要求。
歡迎各位街坊朋友，得閒嚟舖頭座下啦。。。。
地址係「紅磡廣場地庫B88號舖」
ha ha ha.....容我做下小廣告啦~~~
介紹一個無比美味，極度簡單嘅豉油雞做法。
奶是我娘親鑽研經年之後得出最簡化版嘅豉油雞做法，但係食過嘅人，無不舉手稱贊叫好~~~
相信本小俠，你的味覺，有得救。
材料「薑數片、蔥一扎、生抽老抽糖適量」
豉油已夠味，無需額外加鹽。
如果嗜咸者，可適量添加，不過醫生警告市民，食鹽過多，好易變高血壓。
係超市買隻冰鮮雞，老公最鐘意，鬆軟無雞味，佢話「好夠滑」
阿姐代斬兩邊。易熟。
將雞去頭去股，洗凈之後就咁擺入薑蔥之上，加一細碗清水，開火煮至收汁即可。
係咪簡單得好驚人咧~~~
但其實，味道真係好好好好味㗎。。。。
炒多個菜仔，搞掂！
忘記一提，我至愛嘅，係煮好之後嘅「蔥」~~~~
~~~~~~~~~~~~~~~
又到亂拍時間。
今日係樓下平台，望上自己屋企，想數一數自己住邊層，但原來，天都幾乎唔見佐。。。。
最清楚見到星星果一年，係15歲果年，同阿爸去雲南出trip，夜晚時份，宿於一間山頂之中嘅酒店，四周一片漆黑，靜寂的空間，清晰可聞的，是四周的蟲鳥叫聲，舉頭之上，係幾乎觸手可及明亮之極的無數繁星，果種自然的美景，豈是三言數語可以形容得到，非得親眼所見，先能為之屏息。
果次，係第一次理解到，繁星嘅意思。
係香港，莫講話星星，連月亮，時辰唔對，自家屋中，都未必能夠見得到。
樓真係越起越高，附近依個樓盤，起緊七十幾層，似乎總要繼續向上起？
莫非要起足88樓。。。。
附近商場成個偏廳，都成為佐售樓現場。
個名，真係庸俗之極~~~
尋晚接埋老公收工，一齊去深水埗黃金行下，諗住幫部PMP買個套套。
經過後巷，好驚有一隻大老鼠跳出嚟。
冬天食蛇羹，熱天食生果啦。。。
幾識執生間舖頭。。。。
深水埗依間地產公司，真係勁，得果24吋左右深，计埋大約都係得果40呎咁大大间~~
佢係簾逢底下隔間細細玻璃屋仔出嚟嘅~~
不過舖不在大，有生意就掂～～
依家依類手作坊式嘅餅家，真係見少賣少啦。。。
佢有我至愛嘅核桃酥，每次經過必買。。。
強哥有時收工都會兜個圈走嚟依度買返打返屋企哄我開心㗎。。。
雖然無冷氣供應，裝修簡陋，但係所有點心好熱鬧咁堆係門口，行過經過，都忍唔住停低望幾下。。。。
以後舊區拆哂，依啲街坊生意嘅餅家，再搵唔返啦。。。
其實舊區最有風味，有歷史沉澱之後濃濃嘅人文氣息，係新區絕對搵唔返嘅味道~~
買半邊燒鴨嚟食，師傅手起刀落，話咁快，三幾下，就幫我斬好啦。。。
啊師傅總鬼咁開心叫我俾佢睇下，我影得佢靚唔靚仔，強哥問佢有無MAIL啊，如果有，SEND埋俾佢睇添啊。。。哈哈哈。。。。
其實香港人都幾開心嘅。。。。
嘩，個門口，係咪好古咧。。。。
斬完燒鴨，拖手仔返屋企~~~
就咁望上去，係咪似一個個盒仔。。。。
我同強哥就住係其中一間盒仔度啦。。。。
提早蒸好碟飯啦，返到屋企，即刻開得餐~~~
簡單~~~
今日七一有假期，強哥約佐我出街，所以提早一日寫定篇食譜，今日準時發出嚟。
晏晝，炒埋最後一包酸筍，屋企無哂存貨。
強哥去客度，唔返嚟食晏。
自己煮佐包面，原來包面無入到湯包喎，不過唔緊要，我都唔用公仔面嘅湯包。
自己用蒜頭同豆豉爆香個鑊，加埋酸筍同炒，加水，加多一匙茄膏，煮好個湯底，放面入去煮一煮，搞掂~~
加佐一匙辣椒醬，酸酸辣辣，勁惹味~~~
夜晚，好耐無整罐頭排骨燜苦瓜俾強哥食，佢之前一日主動提出，想食依味餸。
咁有幾難，即刻照辦。
材料「罐頭排骨、苦瓜一條、蒜蓉、大孖豆豉醬、辣椒干」
做法：
1，爆蒜蓉至焦黃，倒入豆豉醬同辣椒略炒出味。
2，倒入苦瓜，加埋蠔油，俾少少糖，炒勻。
3，倒走罐頭過多嘅油，將肉汁同排骨倒入，加少少水，燜15分鐘。
（苦瓜切粗條啲，食落口感好，罐排骨，得三舊咁多，不過好大舊，幾搞笑）
煮15分鐘基本上苦瓜好入味好腍啦，埋個芡收汁，搞掂~~~
絕對惹味好送飯嘅「苦瓜燜排骨」~~
強哥堅持，一定要「罐頭排骨先整得到咁嘅味」~~~
