芝士西多

中午玩完返嚟，我自己都餓到手軟腳軟，顧唔上自己食，就先煮俾細嘅食，先至好似係完成佐一個任務，才能夠繼續下一個任務。

反以通常煮好，理得佢食與唔食，我無力去追住佢食，煮好擺係出邊，我就自己去做我自己嘅事，佢係出邊食就食，唔食算數，唔知係咪我理得佢少，所以通常佢都會自覺食完。

好多媽媽都有個誤區，以為餐餐都需要有菜有肉有飯，先至係對得住小朋友嘅至營一餐。

其實就算係大人，餐餐類似咁嘅食物，食得多都會胃覺疲勞，何況貪新鮮嘅小朋友。

如果佢乜都唔食，有營到飛起又點。

所以中午我通常都唔會煮得太正式，多數以粉麵小食為主。

依日又整一個快手小食。

打個蛋，好易嘅一件事，就俾小朋友代勞。

兩塊麵包，中間夾塊芝士，然後兩面沾上蛋漿。

然後上鑊煎熟兩邊即成。

我煎緊麵包嘅時候，突然聽到水聲。

擰轉面一睇，個小朋友係度洗緊裝蛋漿嘅碟。

可能係因為入邊已經無佐蛋漿，所以佢自己判斷依個碟無需要再用，咁佢就幫手清洗。

講真，我真係好少特別去教待小朋友，乜係佢可以做，乜唔可以做，我覺得留返多啲佢自己思考嘅空間，佢自己遇到嘅問題越多，佢自己發現解決問題嘅方式就越多，雖然依家佢因為能力關係，我需要係後邊幫佢拾手尾嘅事情有好多，但我相信隨著佢遇上嘅問題越多，佢解決問題嘅能力就只會越強。

雖然依家因為佢對世界樣樣好奇而惹出唔少麻煩，我寧可擔起唔識教仔嘅惡名，都要保持內心嘅平靜，保護小朋友在認識世界嘅路上跌跌又撞撞嘅權利不受世俗規條嘅扼殺。

以一個兩歲半嘅小朋友嚟講，佢洗碗嘅程序完全無錯，而且總要洗得頗為乾淨，基本上可以無需我重複洗多次，算係唔錯。

細火少油，煎熟即可。

一擺出嚟，有個小朋友已急不及待~~

香蕉薄餅

每次買香蕉，總會有凈一兩條熟透無人食。

依日無乜小食俾個小朋友，見條蕉咁熟無人吼，咁就一於整返個小食俾小朋友。

香蕉壓蓉，打入一個蛋，搞掂個漿喇，就咁簡單~~~

然後用平底鑊，煎成一片片。

我煎成細細一塊，易煎啲，一條蕉一個蛋，已經可以煎成五塊。

因為香蕉糖份較高，好易煎到黑麻麻。

所以要用細火慢慢煎。

麵粉都無需要，材料又易搵到，做法更簡單。

三幾下手勢就整好一款小食。

切開嚟睇下，軟綿綿，香甜可口。

但凡圓形，個小朋友都一定會~~~~~

真係吹佢唔脹~~~

煮粉仔

係網上見到網友煮粉仔，屋企人亦教過我相似做法，今日中午又整粉仔俾屋企個小朋友做午餐。材料就好簡單，粘米粉加糯米粉。

咁煮少少一餐俾小朋友，我就用佐五大湯匙粘米粉，一匙糯米粉，用大約五匙熱滾水，搓好個粉糰。

我係早上出門前搓好個粉糰，就帶小朋友落街搵朋友仔玩，返到屋企就即刻可以煮得。

唔同麵粉，依種粉糰無乜筋性。

所以我就用刀面，壓扁個粉糰，再推平佢。

然後切成一條條即成~~~

用蔥頭瘦肉爆香鑊，加水煮滾即成湯底。

加入切條粉仔入湯直接煮熟，起鑊前落一大匙銀芽~~

又滑又軟綿綿小朋友一試即鐘意~~~

芝士南瓜餅

基本上日日都會帶小朋友出去放電。

放完電返嚟，食得又瞓得。

唔知係咪活動量較大，小朋友食得唔算太少，但始終都係唔叫肉肉哋，都係好瘦，不過佢精神好好，就無特別去谷佢肥。

每日出去活動都會有二三個小時，返嚟嘅時候會順便買當日嘅餸菜，陪媽媽買餸嘅時候開始有啲悶~~~

扮馬扮鬼扮眼瞓添~~~

好喇好喇，返屋企煮飯仔喇~~~

通常早上出門之前會準備定中午嘅食物，返到嚟可以用最短時間食得飯，食完飯無耐小朋友就會午覺，每日如是。

依日早上出門前，蒸好一碟仔南瓜，整成蓉。

然後用「麵粉，南瓜蓉，乾依士」三種材料，搓成麵底，再分成兩舊備用。

將麵底搓成薄片，然後擺一塊芝士上去。

另一塊麵底又一樣搓薄，然後將舖上芝士面，捏實邊。

將搓好的麵坯擺入平底鑊，就咁由得佢自己發酵，帶小朋友出街玩~~

中午返到嚟，麵底已發酵完成，落油開火煎佐三分鐘即成~~~~

幾簡單~~~

又鬆軟又好味~~~

返到嚟切佐塊西瓜俾小朋友係廚房食，等佢回下氣~~~

食西瓜食到西瓜汁周身都係，不過都習慣喇，洗就係~~

然後煎好餅仔，成個大餅食完無難度~~~

好好味~~

大雨一日

因為想小朋友接觸群體生活，培養佢嘅社交能力，所以由小朋友一歲之後，周不時都會請邀請其它小朋友嚟屋企一齊玩。

尋日落大雨無地方去，咁就約佐另外兩小朋友一齊嚟屋企玩。

約住同一個屋苑小朋友，近近哋好方便。

整佐啲小食玩食飯仔

臨時約嚟無乜準備，求其屋企有限材料整佐啲小食。

最受歡迎嘅係最後煎嘅幾個南瓜餅，人手一個食得幾開心~~~

丞成日欺負妹妹~~~

同幾個小朋友玩大半日， 無出街買餸，晚餐就屋企庫存有乜煮乜。


開罐頭肉煎香即成，連碟都慳返。

兩個薯仔切絲炒

丞就整個蛋包飯俾佢。

開飯~~~