麻辣福花

福建椰菜花比一般白色椰菜花更鬆散，更易吸味。

好想食少少辣味的餸，所以買佐半朵福花，煮麻辣味。

做法：

1。先用油爆香蔥頭同蒜頭，落一匙麻辣醬，少少豉油同糖，將醬汁煮好。

2。將福花倒入煮好的醬料內，加少少水焗至花熟入味即可~~~

金針雲耳蒸雞

晚餐蒸雞。

買佐隻走地雞，半邊斬件蒸。


雞件先用「豉油，糖，生粉，紹酒」醃好味道。

加入「金針，雲耳，紅棗，杞子，臘腸」撈勻~~

蒸之前擺幾條薑係面，蒸十五分鐘至熟。

簡單易整，好味。

可以提早醃好味，收工返嚟，煮飯的同時起鑊蒸雞，飯熟雞又熟，幾好架~~

炒多個菜仔，開飯~~

信丞已經可以自己上樓梯，不過未識得落~~

係都要稱住阿媽嘅袋仔，成個八婆仔咁~~

識跑識跳嘅小朋友，帶佢落街，真係追餐飽~~

模仿能力超強的小朋友，見阿媽拎住手袋，佢又要拎~~

阿仔依張相，真係同我細個時超級似~~~

俾阿媽搶走袋仔，喊到七彩，幾醜怪~~

唔係要抱抱，而係喊住叫媽媽俾返個袋仔~~

而且係無眼淚果款~~

                      

行下行下，見到一個妹妹離遠行緊過嚟，即刻企定定，個表情都同頭先完全唔同哂，唉，大個佐睇怕都係觀音兵一名喇~~~

玩夠返上屋企，係都要搶媽媽的卡袋，要自己拍卡入大堂

又要自己關門~

簡單兩味

一個師奶教路，煲湯的湯骨愛嚟煮一樣好好味，啲肉好滑。

百佳特價，18蚊磅咋，買佐兩磅幾，煮醬骨架。

第一次整，煮好後原來都幾好味，無影相，下次整再話俾大家知做法。

原本煮好留第二日食嘅，家姐話過嚟食飯，咁就熱好俾佢試下。

好挑剔的家姐都話好味，咁就應該真係幾好味~~~

下次試下用湯骨煮糖醋骨，應該都唔錯。

菜心炒枝竹~~

加埋隔夜湯，一細舊腩肉烚熟切片點醬汁，開飯~~

因為係男仔的關係，我對待丞仔的態度係較為粗線條啲，唔會太過於緊張同寶貝佢，所以由佢剛出世開始，就算佢喊到拆天，我都唔會即刻去抱起佢，由得佢自己喊到飽，喊到收佐聲我先會去抱起佢安撫下情緒。

所以由出世到依家，到瞓覺時間我都係直接抱佢上自己床，然後由得佢自己瞓，瞓得著就瞓，瞓唔著就自己係床仔玩，依家佢已經習慣佐，抱得佢上床嘅，就一定會瞓覺，就算瞓唔著，佢都會自己靜靜攤在床上直到瞓著佐。

瞓醒如果我係床邊，佢就會笑咯咯伸手要我抱佢落床，如果我不在身邊，他就靜靜座著玩床上的玩偶，從來未試過起床發脾氣。

所以尋日下午，佢瞓醒之後抱佢落佐床，無端端佢突然喊到收唔到聲，喊到要座係地下發脾氣，我想去抱佢，佢就轉過身唔俾抱，連俾餅餅佢都用手推開，餅餅WO，佢至愛架，嚇得我，未試過佢咁喊法，摸個額頭，又無發燒，四肢又好靈活唔似整親，喊佐起碼有十分鐘，後來可能佢都無癮，就自己走入廚房，我先省起，佢可能瞓醒肚餓，咁就擺杯水，俾塊麵包佢，即刻收聲，座係廚房地下，直接開食，可憐哦BB，餓到咁咩？

不過依排佢開始出上排的牙仔，都有可能出牙仔痛，佢份人燥啲。

食飽飽，個人精神佐，心情即刻好返哂，我熟悉的笑咪咪信丞返嚟喇~~

簡單兩味

煲啖蘿蔔豬骨濃湯。

細個時飲依款湯，食前阿媽都會落胡椒粉係個碗，飲落個胃好舒服~~~

胡椒同蘿蔔的味道好格架~~

隔夜食凈柱候牛腩，好入味。

烚多碟菜，有湯有肉有菜，好鐘意。

食完的牛腩凈抵的腩汁，第二日早上，淥多個麵，煮個牛腩麵，一啲汁都無浪費``

猩猩仔偷蕉記

媽媽行開唔夠二分鐘，聽到人仔突然靜落嚟，行返出嚟望下，原來有個猩猩仔，竟然三幾下下爬上窗台拎佐條蕉，總要自己識得剝開皮，總要大大啖食緊！~~

睇下個猩猩仔，食蕉食得幾開心~~

一見到媽媽走出嚟，即刻擺定無辜表情打定底先，但個嘴係未停過，繼續架~

見到媽媽影抵罪證，猩猩兒好醒目地做出阻止的手勢「依位太太，你咁樣亂影人，係唔啱架，係侵犯緊我嘅私穩架，請你立即停止！」

見阻嚇無效，咁唯有你有你影，我有我食，大家各有所需喇~~

我大大啖，繼續，繼續~~~~

拉近鏡睇下個為食樣~~

咬到皮了為~~~

咪當人啲細唔識食，食食下，覺得唔對路，識得拎上手仔細研究下~~~

原來，係食到蕉皮~~~

雖然我哋手指幼幼，一樣靈活無比，蕉皮，係無味嘅，等我撕開佢~~~

咁先好味架嘛~~~

食食下，又食到蕉皮？

索性咪鬼要個皮喇，阻住哂~~~

咁樣大大啖，大大啖，先係嘛~~~

如是者，成條蕉，猩猩仔一人獨吞哂~~~

其實小朋友絕對有能力做到好多事情，譬如咀嚼一事，香港家長去到邊都有一把交剪仔，食物一律剪到碎一碎先俾小朋友，咁小朋友總邊有機會去適應如何控制自己進食食物的份量同咀嚼的能力？進食係人類本能，當小朋友出佐牙，我都會在安全範圍之內，儘量俾佢嘗試不同形態的食物，希望形成一個進食的良好本能。

暫時依個階段，我係唔需要佢識得分辨事物的真相，更加唔會逼佢去理解世界的是與非，我需要做嘅，係儘量配合佢嘅發育程度去激發佢身為人類的存在本能，簡單嚟講，我只需要佢開開心心地「食，訓，玩」三件事~~~