食蘿蔔

通常周末都會唔會係屋企食飯，所以空閒落嚟嘅時間，會炖啲糖水作滋補，聊勝於無。

依個星期花膠糖水，唔用鮮奶，改為紅棗炖，希望對補血有少少幫助。





材料同做法都好簡單「白花膠三片，紅棗適量去核，冰糖，清水」

文火炖一個鐘足夠。

炖一次約莫三碗，同強哥一人一碗，飲凈一碗擺入雪櫃，第二日熱返佢再飲過。

紅棗炖嘅味道，淡淡紅棗嘅香味，好清潤~

另一日晚餐，食蘿蔔乾。

蘿蔔同少少半肥瘦肉，落鑊乾炒出香味。

倒入青椒粒繼續拌炒出香味。

最後俾少少蠔油較味，搞掂~~

好香口，無論愛嚟拌麵或者配飯，都好一流~~

好想食蘿蔔，咁就大半條蘿蔔切粗條，同肉絲炒埋一碟。

開飯~~~

強哥會義室裝修工程記

近兩年強哥長期係中環一間大廈樓上樓下做各間寫字樓的大細裝修工程，最慘係平曰要照顾其它部门的正常運作，所以每次只能搞其中一間的裝修，總要淨係禮拜六曰兩曰先可以開工，搞到一個工程要拖長好多時間，同我好耐無得拍拖，好慘。

不過都不及強哥咁辛苦星期一至五要睇其它工程，周末都無得休息，辛苦哂 !

依個星期終于又搞掂期中一間，我見好靚，又擺上來幫佢記錄。


依次係一間會議室嘅工程，每個星期做兩日，一共做佐八個星期先至完工。

依個係再之前另一個會議室，一樣係用佐八個星期完工。

油漆部份就係強哥嘅四弟負責，絕對靚手工㗎~~~

傢俬部份就響廠訂造，全部都見得大場面，係咪好靚咧~~

最近強哥周一至周五做緊一間好幾千呎豪宅嘅裝修，不過要做到年尾先可以完工,到時得到人客嘅同意，又擺上嚟俾大家欣賞下。

小菜兩碟

阿媽買佐幾十隻白鴿蛋嚟俾我食。


因為早前檢查出嚟，我有缺鐵性貧血，所以要多食啲紅肉或補血嘅食物。

白鴿蛋對於滋補氣血有好好嘅效果，細細一粒，好得意。

係阿媽去間農場玩，先買得到，平時基本上街市係見唔到有售賣㗎，唔平，港紙要五蚊一粒，國內聽講賣到六蚊人仔一粒，總貴。


要好似煮溫泉蛋咁煮，強哥未食過，等佢又試下~~

同土雞蛋相比，細粒好多㗎~~

蛋黃嘅味道比雞蛋黃總要香，最特別係蛋白，同嗜喱一樣樣嘅口感，透明㗎~~





晚上，XO醬炒椰菜~~

青椒炒牛肉~~

加多一個粟米魚肚羹~~

開飯~~

咖喱牛肉配薄餅

細時食咖喱總不認為是件美事。

雖然外人一再肯定母親的咖喱料理是如何的人間極品，可能是太過於習慣了某種味道，因此失去欣賞的能力。

母親有自己調配咖喱的一套功夫，每一種香料都必需是親手舂碎的新鮮食材，味道較為清淡與柔和，偏東南亞南方的口味，煮好之即，勢必要加入椰汁做為一個總結，卻叫我為之氣結，一加入椰汁的咖喱，不錯是增添了一份額外的溫婉，卻總是叫人覺得這份咖喱的立場似乎變得不再硬朗，含含糊糊的味道，叫人沮喪。

長大後嘗過不同國家的咖喱味道，最愛是印度口味的咖喱，濃郁，直接，香辣。

所以在家里烹煮，多數選用印度的咖喱料，較為接近自己喜歡的味道。

煮咖喱不是一件難事。需要的只是多少少的時間去慢火烹製。

洋蔥是很重要的。洋蔥可以為咖喱增加一份自然的甜味，並且煮軟之後，整個融化於咖喱醬汁之間，能讓咖喱醬汁變得濃稠與香甜。

所以製作咖喱第一步，炒洋蔥

額外加佐啲蒜片一起爆炒，增加香味。

第二步，挑選自己喜歡口味的咖喱香料。

如果買的是油性的咖喱醬，可以不需要經過油炒，直接加入肉類烹煮，如果是粉類的咖喱香料，則需要經過低溫下的油慢火炒出香味再加入肉類使用。

我用的是配好的咖喱粉，倒入適量，加入洋蔥里，轉成細火，慢慢將味道炒出來。

第三步，加入肉類。

我依次用的是牛肋條，牛肋條先飛過水。

加入足夠的水，加入一點鹽與糖調味。

水滾後轉小火燜煮20分鐘後熄火，不揭蓋，繼續在鍋里燜半個鐘，重複多一次。

這樣煮滾再熄火再燜煮的方式，重複的次數越多，肉就越入味，越軟綿。




肉已煮至淋軟之後，加入薯仔，開火煮二十分鐘，熄火後不揭蓋焗多十分鐘。

一鍋香濃的咖喱牛肉，完成。

香香濃濃的咖喱，當然配著全手工自製的薄餅來吃，最為享受~~~

開工~~

自製香酥千層餅

屋企附近有間越南餐廳，同強哥至愛係果度嘅全手工制千層餅。

經過自己多次反覆嘗試，終於自己係屋企，已經可以輕鬆地自製出同間餐廳相比，絕對「有過之而無不及」的效果。

而且通常由準備到整好前期麵坯，所需時間都不過區區三個字唔洗就可以搞掂，真係輕鬆又簡單~~~

有好嘢，當然要同大家分享~~

如果係有心人，學識整依款餅仔，絕對足夠搵食用。

做法容我慢慢道來~~

 1、先煮蔥油。煮過的蔥油，會為餅仔增加一份淡淡地蔥香味，當然如果無蔥頭，僅普通的油煮熟也可，咩油無所謂，我用嘅係花生油，依步的重點在於---「油要煮滾」

 油的份量視乎你要製作的多寡去決定，我只做區區兩塊餅仔，所以大約一匙半的油已足夠。

2、煮香的蔥油，慢慢加入麵粉（普通中筋麵粉），不要一下加入太多，否則太稠就不好處理。

 

一邊加入麵粉一邊攪拌均勻。

拌好麵粉的蔥油，就呈現出咁樣的狀態。

所有制餅的材料就咁多：「少少酥油、兩細舊麵團」

麵團就普通室溫水和好的麵，無乜特別。




開始餅仔的製作：

1、麵團搓開，我就好隨意地搓開即可，形狀隨意。

2、然後均勻地抹上酥油，喜歡帶點味道的話，可以在酥油里加入少少鹽增加味道。

3、然後好似折風琴一樣，將麵皮層層折好。

4、滲佐油嘅麵皮，會大大增加本身的靭度，所以可以稍稍把折好的麵皮，用陰力儘量拉長啲，咁樣盤起的時候，盤嘅圈數就會稍多佐，圈數盤得越多，出來的層次就越豐富。

5、盤好的麵，再搓成薄薄的一片，就咁樣，前期的生麵坯處理就基本完成。

6、處理完畢的麵皮，擺入雪櫃，等佢稍稍回個氣，大約半個小時以後，可以煎。

 

我因為係中午製作的餅坯，留待晚上開飯的時候，先再開始煎，放置越長時間的麵坯，煎出來的效果就越好。

關於煎：

其實無需要放太多的油去煎，本身餅就已經有無多油了。

一般我會先開大火，讓鍋子足夠熱，無再將餅仔放進鍋里，快速地把餅子的兩面煎至金黃，然後轉成中火，兩邊煎熟，麵餅一熟，就會乾燥，依個時候，用鏟子或筷子，捅一捅麵餅，酥酥的層次，就會跑出來~~

 餅子不宜久煎，煎耐佐皮就會硬，皮一硬，就唔好食，其實依款餅仔本身好薄，唔洗擔心會唔熟，基本上煎二分鐘最多三分鐘左右，餅就已全熟。

只要掌握好煎的技巧，就能做到咁樣「層次分明，外酥香脆，內軟綿香」 的完美效果~~~

因為係用了蔥油製作，所以食起上來的餅子，帶有淡淡的蔥香，其味無窮~~~

至於這道餅子，配什麼食？

你又估下~~






明天同一時間，關於餅仔的故事將會繼續~~