做節

前日返奶奶度做節，直接上圖~~

屋企有個小朋友剛好果日滿月，紅雞蛋一份

果皮蒸鮮鮑，煎蠔餅，蒸條魚，冬菇魚肚燜鴨腳，生炒骨，白切雞，牛油龍蝦，我整嘅檸檬鴨，煲返碗花膠螺頭湯。

小朋友見風就長，兩個小朋友明顯都長大唔少~~

同堂家姐痴埋一堆玩~~~

檸檬鴨

今晚返奶奶度做節，整佐隻檸檬鴨返去大家食

擺幾片薑入鑊，將生鴨表皮煎一煎出油份。

落生抽，老抽，酒，糖，水，中細火煮大約半個鐘至熟。

準備一粒咸檸檬。一隻鴨用一粒就足夠。

檸檬剁碎，鴨煮好後，收汁時先倒入，太早加入檸檬同煮會令到檸檬皮的苦味走出嚟，最後落可以食到檸檬嘅酸同香而無苦澀味。

斬好入盒陣間帶去奶奶度，唔洗奶奶額外又要整返熱又要斬咁多功夫，今晚見~~

煲啖冬瓜湯

丞越大就越難掌控,而且好明顯佢係一個食軟唔食硬嘅人,如果用強硬的語氣,凝重的表情去要求佢完成某個要求,佢未必聽得明你嘅說話,但一定好識去感受氣氛中的意味而做出更強硬的反對行為,依個階段，做父母嘅既要尊重佢獨立個性的發展又要俾到適當地引導，針對丞的個性，大多數時候,唯有以柔制剛,剛柔並濟地與丞鬥智鬥勇。

老積丞，媽媽知道你知道架，生性啲喇！

尋日丞食冬瓜牛肉燴烏冬

食到好味嘅食物，丞就係下圖依個標準表情，咀咀配合地發出「哼哼哈哈」的聲音~

好似依個食物，真係不可置信地好味，要用誇張的表情與聲調去強調「好好味啊！」

一啖接一啖，睇到都覺得，真係咁好味？

冬瓜，豬骨，茨實，意米，果皮，煲佐啖湯飲。

煲啲時令的湯水，飲落真係好舒服~~

少少有凈的西蘭花，涼拌

想食冬菇，同幾隻雞亦燜成一碟，冬菇最好味~~

丞似乎好鐘意冬瓜？飲佐啖湯，即刻開心到拍手掌~~~

丞有爹爹的遺傳，乜都話好味，在飲食一事上，易湊！

飲到幾滋味~~連湯渣都無放過~~~

飯後一家人熄佐電視，係房親子樂。

好相信對於一個幼童來講，無論幾豐富的物質給予，永遠都不及父母用心的陪伴與玩樂來得重要。

我係好相信一個家庭健康的氣氛對於小朋友長成後的個性有絕對正面的影響，我自己屋企自細就係好簡單好溫暖好多愛的家庭，所以直至今日我都依然相信世間的美好存在，依種正面的心理狀況未必會俾到我豐盈的物質生活，但一定可以帶俾我同我身邊人一份好快樂的生活氛圍。

牛肉飯糰

某日婆婆來探個孫，咁中午就同婆婆係出邊食飯。

丞唔俾人餵，但就經常食到天一半地一半，咁去街食飯，媽媽多數準備手手可以拎住食嘅食物。

依次整飯糰仔帶出街食。

牛肉飯糰。

牛肉用生粉同少少鹽醃好味，煮熟後，撈少少芝士

將煮好的淋飯倒入牛肉度，撈勻

取適量飯

扭幾下就扭實個飯糰

剪少少壽司紫菜，包住個飯糰

搞掂

人仔食得幾開心~~

大大啖~~

唔洗人招呼，媽咪同婆婆開心食餐飯，丞自己搞掂自己餐飯~~

一舊接一舊，出街食飯無難度~

辣椒膏煮牛尾

買佐盒牛尾，本打算煲蕃茄薯仔湯嘅，亞仔至愛依款湯水，不過拖下拖下又無整到，再擺就變味喇，雪櫃有婆婆整俾媽咪嘅辣椒膏，一於用辣椒膏煮牛尾。

牛尾先煎至表面金黃，猛火煎幾下就OK。

辣椒膏係用大紅椒同蔥頭整，未算太辣，取其色同椒香味。

剁碎的辣椒同蔥頭一比一的比例，攪略碎，又唔可以太碎，要保持返個粗粒口感。。

用油炒香，一次整多啲，擺入雪櫃可能慢慢煮餸用，只要油炒熟透，擺三兩個月不成問題。

煮牛尾，取一大匙辣椒膏，加入一大匙黃薑粉，幾大匙椰絲，半個青檸汁，落鹽同糖俾味，加水煮至牛尾淋軟。

煮至剛剛好收汁，略略濕，等醬汁剛剛好掛係牛尾之上，食得~~

一味餸，開飯~