小菲菲俠自煮樂
因為出唔到街，都係叫強哥收工嘅時候順便係附近嘅街市買返啲菜返嚟。
男人對於佢啲唔係太熟悉嘅範疇係需要女人俾一個絕對清晰的指令去解除佢啲嘅無所適從。
所以我好清楚地話俾強哥知，佢只需要幫我買較兩條中等大細嘅涼瓜返嚟，清楚簡單，絕對唔會出錯。
咁，就用依兩條涼瓜，加埋屋企嘅罐頭，組合成為一碟惹味嘅餸出嚟啦。
強哥吃不得苦。
表現係食物上邊，猶其明顯。
所以對於味苦嘅涼瓜，我會先用鹽醃一醃佢，再抓一抓佢，等佢嘅苦味減少啲。
然後將涼瓜用清水洗去多餘嘅鹽份，再汆一汆水。
汆水係令希望用水嘅高溫係短時間煮熟個涼瓜，同時亦都可以保持佢嘅翠綠同唔會太過於腍。
出過水嘅涼瓜過一過凍水，放置一邊備用。
然後將罐頭魚嘅豆豉同油倒出嚟，加少少蒜頭入去，一罐頭嘅油實在太多，唔需要咁多，要倒返一半咁多出嚟，然後就爆香啲蒜頭同豆豉
然後將涼瓜同鯪魚倒入拌炒至入味，鐘意汁多嘅可以落水稍燜一燜佢，再俾返個芡水，都好好味㗎。。。。
不過依日我無落欠汁，就咁炒埋，都好入味好惹味。。。。。
炒埋，都大大一碟~~~
搞掂啦~~
單腳煮餸，絕非雜耍，而係一种不得已下的無可奈何。
依排減緊肥，以我幾十年嘅減肥經驗，一個絕對有效嘅必勝方法就係「運動加飲食」
加大運動嘅量同埋食少再食少啲。
我通常會著一种好焗汗嘅運動衫去做運動，咁就會出好多好多汗，（多到入邊嘅打底綿衫都可以扭出水，好似焗桑拿咁）所以做運動嘅同時都會不停補充水份。
我係去得好盡嘅一個人，一係唔做，一係做得好徹底。
所以，每日二三個鐘嘅運動時間，然後凈食生果做三餐。
依日剛剛做完運動，又洗佐二機衫，又將衣櫥嘅秋冬衫全部收起，將熱天衫擺出嚟，一輪嘅運動加上餓到手軟腳軟，入房嘅時候，上去個地台（因為要加大房間嘅儲物空間，成間房升高個地台，做佐一個榻榻米嘅地台係睡房），自己一個腳仔軟，未踏穩個右腳，左腳成個踩空，成個人向後翻側，而個右腳即刻本能反應去著地，點知企不穩，後果係左腳成個擦傷一大片，右腳尾指骨頭著地受傷，扯到個筋，當下成個人座住係個地下，先鬧自己十秒之後開始感覺無比痛楚，然後座係地下好似一個BB咁放聲大喊佐一陣，因為得自己一個人係屋企，喊都無人呵返，覺得好傻，即刻收聲，打電話俾老公，等老公返嚟錫錫，期間試過，發覺都可以扭動，知道無傷到筋骨，都還好啲。
老公要我陪去睇跌打，我勁怕睇跌打，佢又扭又大大力捽，未好返都痛到死啦，生仔可能都無咁痛，所以係都唔制，話自己無傷到筋，擦跌打酒就可以啦，點知到佐下晏，成個右腳腫佐起嚟，踩都踩唔到落地下，好驚會唔會自己低估佐個傷勢，腍住過一晚睇下，如果第二日情況無好轉，就要去睇醫生。
好彩，瞓醒一覺之後，個腳已經好返五成，行雖然跛下跛下，不過已經唔係好痛啦，只不過成個右腳，變成一隻超大茄子，又腫又紫哂~~
今日係第三日，依家，我已經換好運動衫，準備陣間又開始做運動啦，個腳可以就住力去做輕微活動，都係出身汗，個人會感覺舒服好多~~~
總有一件最好嘢嘅事，我當時俾完電話老公之後，我阿媽即刻打嚟一個電話，佢話突然好似好想俾個電話我，我即刻話我頭先跌傷佐啊，不過叫佢唔洗過嚟啦，應該無乜大礙，咦，莫非阿媽同我有心靈相通，知我當時有啲事發生，有唔妥？~~~
但係自己一個係屋企座定定會好悶，所以老公收工之前，都係單腳跳下跳下，走去煮佐餐飯，咁時間過得快啲嘛。
無辦法出街買餸，就住雪櫃嘅有嘅煮餐飯啦。
凈有幾舊燒鴨，起骨切絲，同白菜炒埋一碟。。。。。
罐頭同蛋都係屋企長備嘅，依個時候就係發揮效用嘅時候啦。
煎個荷包蛋俾老公，煎多罐午餐肉，搞掂。。。。。
臨收工前強哥先話俾我聽三佬要過嚟食飯，臨時臨急，都無乜餸整添，好彩雪櫃有一盒早一日整好鹵水雞亦尖，係腍住睇戲時食嘅，咁就將佢加返熱，就一碟餸啦。
一扎通菜，用馬拉盞炒埋佢，都係得一碟仔咋，不過似乎三佬都好鐘意食。。。。
臨尾加埋一湯匙油蔥酥，香噴噴。。。。
有一盒豆付，原本今晚係腍住一個炒通菜加埋一個肉碎煮豆腐，咁有人嚟屋企食飯，整靚啲好睇啲，咁就轉成豆腐讓豬肉。。。。
都睇得下食得下㗎。。。。
蛋嘅作用真係好百搭，突然有人嚟到，點整都可以整到一碟餸出嚟。
凈有少少豬肉，將佢炒散炒香，打佐三個蛋，煎成兩餅，煎成嘅蛋餅卷起再切段~~
面再加少少茄汁，香香酸酸，又幾惹味㗎~~~~
一啖一舊，幾好~
都係自己屋企人，求求其其一餐，無所謂啦~~~~
好傷心啊，又有一條魚仔走佐啊今日。
點解依批魚仔都無我以前係舖頭養果啲咁硬凈咧？
今日走嘅係一條好細嘅魚仔，短短肥肥，好可愛㗎，而且最重要係，佢係一條好特別嘅魚仔啊。。。。
就係下圖圓圈入邊嘅果隻黑色短尾魚仔~~~
初初買返嚟嘅時候，佢真係全黑㗎。。。。
特別之處在於，買佐其它幾條金魚之後，依條黑色魚仔，開始慢慢產生變化。。。。。。。
睇下個肚仔。。。。
等佢轉個身再影返張。。。。。
特別之處在於，佢真係慢慢受到其它魚仔嘅影響，由黑色，變成金色啊。。。。真係好特別~~~~
以前係有聽講過魚仔會變色，不過依次都係第一次自己見到，腍住將佢變色嘅過程影低，到佢完全變成金色再擺上網同人分享。
過多一個星期，已經好明顯覺得佢變成金色。。。。。
腍住過多半個月就可以變成金色，點知。。。
今日走佐。。。。。
四五月份係魚仔們嘅發情期，我一時無留意，尋晚我瞓佐之後，佢啲幾個小朋友無無聊聊走去打交喎，搞到依條細魚仔，被其它魚仔咬到遍體鱗傷，成身嘅鱗片都支離破碎，悽慘。。。。
等我睇到想將佢分開到細缸時，佢已經好虛弱，未幾，就走佐。。。。。真係好唔開心。。。。。
一條識得變色嘅魚仔，無佐~~~~
表姐收佐工之後嚟我度食晚飯。
知佢平時好忙，都好耐無煲過湯飲，所以就煲佐一個蓮藕湯俾佢飲。
表姐係好叻煮餸嘅人，結婚以前，以我一個完全嘅廚房白痴睇嚟，表姐嘅廚藝係我輩莫可企及嘅大師級，不過依家佢忙於返工，已經好少入廚大展身手，認真可惜。。。。
無關係啦，佢唔得閒，過嚟我度，我整俾佢食啦~~~
表姐嘅口味同我大致相同，所以基本上我唔需考慮，煮平日煮開果啲，就包保無錯~
整佐幾個涼拌菜，一個涼拌青瓜~~~
一個涼拌牛肉，依次買佐芫莤，又加佐舂碎嘅花生，當堂香好多好多。。。。
整佐一個涼拌粉絲。
加佐特別調味，成碟嘢即刻變得與別不同起嚟。
整涼拌，材料隨個人鐘意，至緊要嘅係個調味汁嘅調較。
依次我用佐粉絲、甘筍、木耳、昆布少少。
粉絲嘅彈牙加埋甘筍嘅清香，同埋爽脆嘅木耳，少少昆布絲嘅海水味，食落口感非常之特別。
依次整涼拌粉絲特別之處在於個醬汁，我加入佐。。。。
一粒咸檸檬~~~
咸檸嘅香味係無與倫比，咸咸酸酸嘅味道愛嚟整涼拌最是一流。
配以容易縮味嘅粉絲，效果一流。
因為涼拌粉絲我想要嘅凈係甜味同酸味，要突出嘅係咸檸檬嘅清香，所以個醬汁我凈係落佐「咸檸檬、砂糖、黑醋、花椒油、麻油」
就咁簡單~~~
粉絲好易變腍到痴埋，所以我係煲滾水之後，將粉絲倒入去浸一浸就熄火，浸一分鐘左右撈起過凍水，然後撈少少麻油等佢唔會痴埋。
最後將所有醬汁同材料撈勻，自己試下味，最好等所有材料凍佐之後再試下味，因為凍佐之後嘅味道同粉絲熱時嘅味道會略有偏差，覺得太酸就加糖去中和，覺得唔夠惹味就再加少少醋，就咁簡單~~~
加佐咸檸檬嘅涼拌粉絲，第一次整俾強哥食，佢一試之後大為贊賞，有一种耳目一新嘅清新感覺，夏季食欲不振之時，咁樣一大碟嘅涼拌粉絲，已經可以係我一餐嘅主食~~~
整佐一個熱菜。
本嚟係想整讓苦瓜嘅，不過買唔到靚嘅油苦瓜，見到街市有細細個嘅甜青椒仔，即刻買佐一磅返嚟，整讓青椒，都樣好好味。
依隻細青椒，一啲辣味都無，好清甜，同埋個皮唔會起一層老膜，愛嚟整讓青椒，非常一流。
做法好簡單，各個都有自己嘅方法去整煎讓三寶。
奶奶多數用自己打嘅膠魚肉去整，我懶得整咁多功夫，凈係買佐舊豬肉自己剁碎，加調味醃好就讓入青椒度。
先將讓好嘅青椒用少少油煎到表皮變腍，然後爆香蒜頭同薑絲同豆豉，然後加水，加蠔油，略燜。
燜十分鐘都肉熟，水多就加個生粉水打芡，搞掂~~
味道好香，只可惜我落得個鹽多佐少少，個餡好咸，愛嚟配白飯就一流，如果就咁凈食，略嫌咸佐少少。
因為涼拌餸多，可以食少啲飯，食多啲餸，希望表姐食得滿意啦~~~
