古時候嘅人，一隻瓦煲仔，已經可以煮飯煲水滾湯碌面，乜都可以搞得掂。
四五十年前，阿媽後生嘅年代，佢無焗爐用，就整個鐵架，上下格燒炭燒柴，中間擺上蛋糊，一樣焗到蛋糕出嚟，無擠花袋，自己用超大針筒改造，無牛油，就用豬油，一樣焗到又香又鬆化嘅曲奇出嚟。
今日，煮飯有飯煲，炒餸有生鐵鑊、熟鐵鑊、易潔鑊、有深pan淺pan同坑紋pan。
當廣告舖天蓋地的入佐屋，上佐腦，話佐你知，一個家庭，應該煮飯用飯煲，炒餸用深鑊，煲水用水壺，之後，我啲就聽話地，煮飯用飯煲，炒餸用深鑊，煲水用水壺。
好突然地發現，當選擇多佐嘅時候，面對生活嘅應變能力，我啲依一代人，變得好遲鈍。
-------------------------------------------------
表哥聽日會同表嫂嚟我度，咁煮返幾味招呼下係好應該嘅。
其實我有好強嘅煮飯慾望，好開心睇到有人食到我煮嘅食物，之後嘅大聲贊好，就係最開心嘅事。
買佐兩條牛腱，先鹵好佢，到時整個泰醬，牛腱切片即刻可以上檯。
再買多兩盒排骨，做自己嘅晚餐。
都唔爭再烚多幾隻蛋嚟鹵埋啦。
所有材料先汆過水。
然後，倒入我嘅陳年鹵水。
用佐都接近兩年啦。
時不時都要煲返滾佢，咁個鹵水就可以保持得好耐啦。
將汆過水嘅牛腱同排骨，掉入去，開中火煮半個鐘。
個鹵水汁，我每次再用，都會因應材料嘅多寡去決定味道嘅濃淡，如果覺得味道已經唔夠，可以再加豉油、八角、香葉等調味落去，以保持味道嘅濃鬱程度。
因為牛腱煮得太腍就會失去嚼勁，食牛腱，係要有少少硬硬哋，有得咬下咁先過癮㗎，所以我凈係煮佐半個鐘，就熄火，焗住佢。
咪睇小焗住嘅步驟啊。
因為當你一路咁滾住啲鹵水嘅時候，個肉係會煮熟煮腍，但係個鹵汁一路咁滾，個肉就一路係咁加熱嘅時候，味道就只會係肉嘅表面徘徊，你煮得再耐，個味都係好難入到肉嘅入邊㗎。
所以，熄火焗住佢嘅目的，係要等個肉，熱脹之後嘅冷縮，可以俾個鹵水嘅味道順勢一起進入到肉嘅里邊，咁先可以達到「鹵」入味嘅目的。
其實鹵食物係咁，做嘢係咪都一樣道理咧？
如果一味凈係識得去衝，埋頭苦干，咪就好似鹵緊嘅時候，係咁開大個火去煮，表面睇到，似乎上色好靚已經好夠味咁，但實際一切開就知，內裡都依然故我，根本食之無味，所以識得去衝去搏嘅同時，都要識得停一停，反思過程，總結得失，先至可以真正地將經歷轉變成為經驗，若有經驗傍身，所有一切，都能從容對待，先至係真正地，由外至內地，夠曬味道~~~
係熄佐火後，先至將蛋掉入去，慢慢浸入味。
排骨係自己嘅晚餐，要佐一大匙鹵水汁，加少少水再燜耐啲，肉排腍啲好味啲，原本打算係開大火，燜至收汁，咁無論係口感或者外觀定係味道，都會好正㗎啦，點知。。。。
行開佐一陣係房，聞到味道唔妥，即刻衝入廚房，好彩都救到，不過水已乾，個排骨嘅一邊，已經好似焗爐焗嘅效果，又香又脆，幾正啊，哈哈哈。。。。。
不過唔想食香焗排骨，我想食有啲濕濕嘅~~~
諗起鎮江骨，傳統做法會炸熟再整個甜酸芡汁焗一焗，咁我就當依個肉排我係炸過嘅，所以鑊入邊，再加幾湯匙水，一大匙鎮江醋，砂糖，茄汁，倒入脆卜卜嘅唔似鹵水排骨嘅鹵水排骨入去，開大火，煮幾下收汁，搞掂`~~
剛剛搞好，老公就有門鐘叫我開門，即刻問我，煮緊咩，一出lift口就聞到一陣異常香嘅味道。估都估到係我煮緊餸。
我就叫佢自己入廚房睇，一睇到即刻話「正，有排骨」
好自覺地幫我擺碟，咁我就去幫飯煲鬆下飯~~~
睇下，個芡汁煮得剛剛好，芡汁全部掛住係排骨度，唔會太濕。
因為落佐有茄汁，茄汁里邊有澱粉類嘅物質係度，所以落佐茄子嘅醬汁無需另外俾生粉埋芡，佢自己會收汁變濃稠㗎啦。
炒多碟菜，就開得飯啦。
本嚟係想碌嘅，不過等水滾時間長，所以索性炒啦。
生菜唔洗炒得太耐，一轉腍身就得，起鑊前落蠔油俾味~~~
滿滿一大大碗菜~~
炒好，都係一碟咋`~~
老公有一間成日去幫襯開嘅茶餐廳，最愛叫嘅係其中嘅一款「鎮江骨飯」，依次老公邊食邊同我講「果間餐廳嘅鎮江骨真係整得好好味，不過如果相比之下，我覺得你整嘅依碟，再好味啲添啊」~~~
依味咁好味嘅排骨
1，用鹵水鹵過，變成好鹵水排骨
2，煮到乾水，變成鹵水燒排骨
3，加佐醋，變成鹵水鎮江排骨
食落好香嘅鹵水味道，加上外脆內軟嘅口感，變成豐富與奇妙嘅層次感，確係會錯，有錯著㗎~~~
