住家菜----香菇甘筍牛蒡湯、面豉排骨煲

 

同阿媽通電話，成日提我要煲下牛蒡湯嚟飲，對身體好有益，聽得多羅，亦都好耐無買過牛蒡煲湯，所以尋日就走去買佐扎日本牛蒡，真係好鬼貴，但係講真，佢嘅味道，真係濃郁過內地出品嘅牛蒡好多好多。

材料就係屋企有乜就落乜咁羅。

咁就落佐甘筍二條，陳皮一大塊，杞子百合少許，牛蒡一扎。

 

另外，總落佐幾大朵香菇。

點解要落香菇？因為阿媽唔知聽邊位佛教朋友講，香菇牛蒡湯係最強嘅殺癌症湯水，平日飲用都有強身健體之功效，依哋無實際驗證嘅民間小偏方，飲佐又唔會有咩事，索性照葫蘆畫瓢，有樣學樣，人落我落。。。

初時都好擔心，落香菇，啖湯味道會否極之怪異？

而牛蒡我就去皮之後切薄片再煲湯，咁樣比較容易出味。

 

除佐材料，落佐一個雞架同少少排骨去增加鮮味。

阿媽話其實依個湯水滾湯咁煮都得㗎，唔一定要煲好耐，所以依個湯水我都係煲佐半個鐘左右，快速煲。

 

原來落佐香菇嘅湯水，非但唔會怪異，反而係有一種獨特嘅香味，依款湯水飲落清甜非常，莫話佢有特殊強身功效，就係為佐啖咁清香嘅湯水，我都應該時常煲嚟飲啦。。。。

 

上次朋友俾佐一盒天然飼養超過一年嘅豬嘅排骨，據說食落味道清甜之餘肉味濃郁，非香港一般市售豬肉可比。

俾佐我都好多日，因為無時間食佢，雪住佢都幾日羅，依日解佐凍之後，原本諗住用豉汁蒸，不過用佐少少煲湯，凈返唔係好多，所以又轉成用豆卜去燜佢，加七加八，睇落碟餸會多D嘛。。。

準備嘅材料有：豆卜，荽莤，蒜，面豉醬一湯匙，排骨。

上次買嘅韓國大醬食完，係樓下求其買佐盒面豉。

依個面豉唔會太咸，味道有少少偏甜，在可選擇嘅產品入邊都叫OK可接受，但係如果同上次買嘅果款大醬相比，味道上就差得好遠，豆嘅香味真係爭佐D，無乜豆香味。。。。

做法：

1，熱鑊爆香蒜頭，然後倒入排骨干炒至表面略見焦黃。

2，落面豉炒香，落水燜煮。

3，即將收汁之前倒入豆卜燜至收汁。

4，熄火後倒入切成段嘅荽莤。

 

轉入瓦煲仔開火煮五分鐘左右，一煲香噴噴惹味實足嘅面豉排骨煲成~~~

個豬骨真係名不虛傳，我都雪佐幾日啦，食落都依然係肉味香濃鮮甜，口感係有一种意料之外嘅「爽」，但係又唔會韌或起絲咁啵，正。。。

係有少少少少少少肥膏。。。。

正是因為如此，食落好滑。。。

 

一湯一煲一晚餐~~

 

 

豬油膏的製作(肥膩程度爆登請慎入)

中國傳統糕點好多時都會用得著豬油膏,不過近二十幾年嚟,豬油膏係日常生活中嘅作用經已式微,大多數人"聞膏色變",非要清晰與豬油膏劃清界線先至可以稱為現代人.

所以基本上年青一輩,識得自制豬油膏者,真係基本無乜.

人說"家有一老,如有一寶",好多傳統嘢雖然已經漸漸地成為一個傳說,不過幸得家中長輩提點,我都得幸嘗試一番.

香港要買到純肥膏實在困難,除非同相熟嘅豬肉檔預訂,否則市面上基本上係搵唔到肥膏㗎啦.

不過同香港一河之隔嘅深圳,都總可以係傳統街市度搵到肥膏買,依日走去深圳,買佐舊肥膏返嚟,因為生豬肉係唔可以帶過關,所以買到生嘅肥膏,咁就去朋友度,用水烚熟先至帶返香港.

睇下,成舊嘅肥豬肉,真係好肥.....

係無皮嘅~

 

作法:1,將肥膏切成一舊舊.

 

2,凈鑊開細火,將切好嘅肥膏擺入鑊

 

3,慢慢煎,一陣間就會出晒油.

 

4,煎到肥膏變輕浮起,D油出晒嚟.

 

5,凈返嘅油渣,可以愛嚟炒菜,好好味.

 

買佐一斤嘅純肥豬肉,四蚊人仔一斤,榨做好多油出嚟啊....

係咪勁抵咧.....

 

整好嘅豬油,最好搵一個闊口樽裝,我至鐘意用依隻食品嘅玻璃樽嚟裝,一斤肥膏,剛剛好裝夠一樽.

一斤嘅肥膏,大約可以出嚟十一兩嘅豬油.

點解要用闊口樽裝咧?

睇下圖...

因為凍佐嘅豬油,就會凝固成咁樣㗎啦....

用闊口樽裝,咁就方便取出嚟用.

自己整豬油膏,就咁簡單㗎啦,而且保證衛生同無添加羅,擺係雪櫃,可以用好耐好耐好耐㗎.....

 

果日整好豬油,順手整埋一底馬拉糕.帶返去奶奶度,老爺超鐘意食我整嘅馬拉糕㗎.....

發得幾靚,爆曬口咁.....

比蛋糕總好味....

 

 

 

住家菜---上海菜飯+馬拉盞肉碎煎茄子

一個人唔介意別人眼光，坦然表達個人情緒同意見，我認為依個可以稱為「率直」

一個人唔理會別人感受，肆意發泄個人情緒同意見，亦都有人將佢稱之為「率直」

大家表達嘅方式，前者會係顧慮別人嘅感受之下先至用一种更為婉轉嘅方式去堅持自己嘅立場同意見，而後者，根本唔會顧慮別人感受，為捍衛個人最大利益而無所不用其極嘅說話方式，較易傷人於無形而不知，因此我個人認為，前者可以叫「率直」，而後者，我稱之為「刻薄」

刻薄係自己最不屑為之嘅一件事，呈一時之口快而講出尖酸刻薄嘅說話，永遠要提醒自己唔好去做，因為刻薄嘅說話講得多佐，心都會漸漸變得同樣刻薄，對於一個刻薄嘅人，永遠要敬而遠之。

-----------------------------------------------------------

早一日買佐斤菜，煮凈幾條菜仔，本嚟係諗住碌面時食，不過無煮到面，幾條菜仔又凈佐係度，炒又唔夠一碟，掉佐又浪費。

心念一轉，何不煮上海菜飯。

菜係用白菜仔嚟整，洗凈之後切細粒，落鑊用油爆至軟身，落少少鹽同雞粉調味。

唔使炒得太熟㗎，一變腍身就可以。

 

飯就好似平日煮飯咁煮，不過睇時間，總有八分鐘左右煮好飯嘅時候，就可以將炒好嘅菜放入去。

 

如果飯煲無顯示剩幾分鐘煮好飯嘅功能，咁就見到飯煲出煙，飯都開始乾水嘅時候將炒好嘅菜倒入去，同飯撈一撈勻，然後繼續就咁煮飯程序。

 

咁樣整嘅菜飯，菜又唔會變得黃陣陣，而飯里邊亦都會有菜嘅香味，有少少調味，咁樣菜飯，真係好好味㗎。。。

有少少炒飯嘅口感添。。。。

舊時上海人懶得煮咁多又菜又肉又飯，就索性一煲煮晒，同廣東嘅煲仔飯，有異曲同工之處。。。

 

上次係街市，五蚊有三條大大條茄子，食凈二條，今晚有菜飯，咁就再炒多一個菜就足夠了。

好耐無食過馬拉盞，其實馬拉盞同茄子嘅味道好格㗎。咁一於就整一味馬拉盞煎茄子。

通常酒樓做法，會用油過一過茄子，咁茄子先至會香口，咁我唔想咁浪費油同埋唔想食得咁油，所以就先將茄子蒸八九分鐘，蒸熟佢。

 

然後準備配料：肉碎少少，馬拉盞一湯匙，薑蒜薑蓉少少，屋企凈少少蒜苗，切佐蒜白出嚟做配菜。

 

炒法：1，落鑊爆香蒜蓉薑蓉等配料。

2，倒入肉碎炒熟，撥至一邊。

3，倒入已蒸熟嘅茄子，落少少油，將茄子炒出香味

4，倒入馬拉盞同其餘材料，炒勻味道即可。

（因為馬拉盞我係自己加工過，已炒熟有香味，所以用之前唔使用油爆，如果係買市售一舊舊嘅馬拉盞，就要先落油炒出香味再同茄子一起炒）

已蒸熟嘅茄子唔會再縮油，反而出佐少少水，不過用油去煎香佢，同油炸過嘅茄子，一樣咁好味㗎。。。。

一碟好惹味嘅「馬拉盞肉碎煎茄子」

 

加埋隔夜雞湯一煲，一個菜飯一個茄子，夠夠。。。。

 

 

 

有魚有菜之---蕃茄魚、煙肉菜菜煲、當歸雞湯

尋晚整佐係奶奶度帶返嚟嘅半條黃腳笠。

依家D魚真係生得好肥好大隻啦。睇下條接近二斤重嘅魚，同奶奶一人一半，都好大一份架。。。。

幾厚身啊。。。蒸我驚未必咁好味，始終擺佐一日，咁就煎香佢，整蕃茄魚，酸酸甜甜，開胃。。。。。

先將條魚洗凈之後煎香。。。。

我用鐵鑊落少少油，半煎炸咁煎熟。。。

 

然後準備配料：蕃茄二個，薑絲，蒜適量。

 

做法：1，蕃茄去皮切粒。

2，熱鑊落油爆香薑同蒜

3，倒入蕃茄炒腍身

4，落頭抽、白醋，糖，調味，加少少水煮。鐘意汁多就落多D水。

5，將魚擺入略略燜入味即可。。。。

（整依款我唔放鹽，因為整甜酸嘅餸菜，我覺得落鹽會有苦味，所以咸味就用生抽或頭抽去俾）

勁惹味嘅一碟蕃茄魚。。。

 

買佐一斤嘅白菜仔，又煮煙肉菜菜煲，做法以前講過，唔重複了。

不過今次落佐薑蓉，真係好味好多啊。。。。

好清爽嘅一煲菜菜煲。。。。

 

尋日M到，周身唔舒服，好想飲啖暖湯，咁就走去樓下超市，買佐盒走地雞嘅雞架嚟煲湯。

落佐雪耳、紅棗、杞子、淮山、黨參、當歸等配料。

補血氣嘅一款湯水。

 

紅棗落多少少，飲落好濃郁嘅紅棗同當歸味，兩種味加埋嘅味道，奇異地芬香，啖湯飲佐，真係完全明白點解叫齒頰留香，D藥材嘅香味留係口腔內久久不散，好舒服。。。。

而且落佐好多甘筍，啖湯飲落，濃而不濁。。。。

 

兩餸一湯，搞掂。

 

 

又食又拎---返奶奶度食飯

尋日返奶奶度食飯，得五個人食飯，奶奶都整佐好多餸，食得好滿足。

買佐幾條魚仔，先用鹽醃入味，再煎香香。。。。

原嚟魚仔煎香香都咁好味㗎，下次我又要係屋企整嚟食。。。。

 

依輪D海魚開始長大啦，老爺尋日網佐兩條好大條嘅黃腳笠返嚟，蒸佐一條斤兩重嘅，另一條近二斤重嘅，我同奶奶一人一半，我帶佐一半返嚟，今晚再整嚟食。

好肥美，好滑嘅黃腳笠。。。。。

連墨魚都好大隻，老爺尋日早上網到一隻，都帶埋返嚟，奶奶用黑椒爆香佢，勁好味。我專登擺係自己面前，食佐好多啊。。。。

總有一碟奶奶至經典嘅梅菜蒸肉餅，超好送飯。。。

蒸埋一碟難亦，睇落好滑。。。。

不過其它餸都食得飽飽，無時間食佢羅~

蒜蓉炒佐碟菜。。。。

 

湯水正啊，菜干豬骨豬肺湯。

豬肺奶奶話整佐成朝先整好，奶奶話依款湯水好好㗎，秋天飲最適宜，叫我學整，我一聽到豬肺嘅處理都要一個早上，咁麻煩，嘅刻耍手擰頭「唔制啊，咁複雜，唔學」

奶奶即刻話「係啊，整唔好，啖湯會好臭㗎，好啦，你哋想飲就返嚟，阿媽煲俾你啲飲啦」

我兩個阿媽都咁好嘅。。。

奶奶煲佐成三個幾鐘嘅湯水，好好味~~

 

湯渣撈起，我好鐘意食煲湯嘅菜干。。。。。

 

依餐五個人食，本嚟總有幾隻蟹要蒸俾我，我即刻阻住奶奶「食唔到㗎啦，不如蒸好我帶返屋企再慢慢食過啦」

帶佐幾隻花蟹返嚟，做凍蟹。

 

花蟹係清甜哋㗎，食落有淡淡海水嘅味道，加埋蟹肉本身嘅清甜，就咁食已風味實足，無需另點薑醋，頭先訓醒食佐一隻蟹做早餐，哈哈哈，誇張嗎`~~

美味住家餸---黑椒牛仔骨、油渣豆角煲、馬拉糕

所謂一雨成秋。

前日嘅一場雨，連接嘅二日天氣都感覺到秋爽之意。

天氣一涼涼哋，個人就好想食肉。

買佐磅牛仔骨，用黑椒碎加生老抽糖白蘭地醃入味。

 

 

利用牛仔骨本身嘅肥膏，鑊落少少少少油，開細火，好似鐵板燒咁，慢慢將牛仔骨煎至半熟。

然後倒入先爆香嘅洋蔥，落幾湯匙水加蓋燜一燜，搞掂。。。

一碟惹味嘅黑椒洋蔥牛仔骨。

 

好難得係街市見到一舊稍肥嘅五花腩，咁就即刻買佐落嚟，小心剔開肥膏部份，將肥膏部份炸成豬油渣。

我係好鐘意食豬油渣炒菜㗎，會特別甘香。

而豬油膏，可以整中式糕點，自己泡制嘅豬油，食落點都放心啲。

 

美味嘅豬油渣炒豆角。

 

一肉一菜一晚餐。。。。。

 

尋日順手整埋好耐都無整過嘅馬拉糕嚟食。

依然都係咁好味。。。。。

一整好我忍唔住食佐一大舊啦~~

 

好鬆軟嘅馬拉糕，而且睇下發酵嘅泡狀可知，係用酵母發酵而成，而唔係用泡打粉一類速成。。。。

酵母整出嚟嘅馬拉糕無論係口感或者味道，都有別於泡打粉製成，好香㗎。。。。

馬拉糕做法可參考依個網址：

奶油馬拉糕製作