小菲菲俠自煮樂

30 7月, 2009

勁北方feel嘅一餐---生煎包+蕃茄勝瓜湯

老公好鐘意食生煎包。我有時懶得整,都會係中式包點舖買一盒返黎俾佢做小食,佢似乎食極都唔會厭咁,成日就會同我落Order叫我買餸時順便買十蚊/四隻返黎,夜晚收工返黎,我就預先擺入焗爐熱住佢,咁等佢返黎未食飯之前,先嚼二隻過下口癮咁喎。


其實係出邊食得多,都唔知人哋俾D乜嘢肉你,同埋加佐D乜落去攪個肉令到佢咁香,所以其實我唔係太鐘意係出邊買。尋日整饅頭做早餐,咁就順便買佐十蚊肉剁碎,自己整生煎包。


整生煎包,我就覺得個餡嘅味道好重要。


試佐幾次之後,我較佐一個味最香,最似出邊食到果D。


材料:


“鹽,牛肉粉,糖,醬油,生粉,料酒,香油,胡椒粉”加水攪至起膠,然後撈入蔥花與姜蓉。


(牛肉粉真係幾香㗎,係尖沙咀金巴利街果度嘅韓國食品舖買㗎,滾湯或者做餡,落少少真係會香好多)



 


而個包皮就係發酵佐嘅面團,發酵面團我以前講過好多次,有興趣可以重新翻閱。


用發酵佐嘅面團,將較好味嘅肉餡包好一個個包包。擺住醒面十五分鐘,進行第二次發酵。


本黎幾靚㗎,點知發佐酵之後,變得越嚟越醜樣。。。



 


第二次發酵完畢之後,先落油入鑊,將包包嘅屁股先用細火煎到香脆,我自己叫依步叫「上色」



 


翻過黎睇下,煎成咁香香脆脆就得了。。。



 


好啦,上完色之後,就用一細細碗仔水,落一細匙面粉開佐碗水,倒入鑊度,開中火慢慢焗。


依步我就叫佢「蒸包」


點解個碗水要落少少面粉咧?因為落少少面粉,咁碗面粉水就可以同個包包mix到,個生煎包底最後會形成一層薄薄脆脆嘅面皮係度,會香好多㗎。。。



 


咁就蓋住佢,開中火焗。。。


焗幾耐要似乎你碗水有幾多啦,最好就無行開太遠,時不時望下佢,當聽到個鑊有滋滋喳喳嘅響聲出嚟,就表示開始收干水,咁就要睇住火啦,差唔多就好熄火,由得佢煎到個包包底脆身。。。。



 


凈有少少面嘅邊邊角角料,我就用少少肉餡,用整蔥油餅嘅方式,整佐一個肉餡嘅餅仔煎熟佢,原來好好味啵。。。


下次要專登咁樣整一次嚟食。。。。



 


咁個底煎到香香啦,個面我又翻佐一次身等佢煎下,香口D。。。


其實都幾大隻㗎個包。。。。


 



 


睇下,個包皮,唔會太厚,又有發起嘅效果,食起上嚟好香好鬆軟,而且個餡依次整得又好香,食落真係好好味。。。


得到老公「正面地,高度地,熱烈地」讚賞~~~


佢話喎,有九成似佢係上海食過嘅果D生煎包咁好味。。。


 



 


凈係包包太少佐D,學北方人,佢哋食包當主食,然後再滾多碗湯或者粥,咁就一餐啦。


我又試下滾一個湯去配包包食。


用佐蕃茄一個,勝瓜二條,粉絲一扎,整包剩低嘅肉餡,滾佐一個湯。。。



 


原來酸咪咪,又幾好飲喎啖湯。。。。



 


咁樣食包飲湯,原來都幾好味,而且都會飽㗎。。。。



 


---------------------------------------------------------


係個櫃度俾我發現一包唔知幾時買落嘅粟米粉,係粗粒嘅粟米粉,我都唔知買嚟點嘅,睇日期就嚟過期,要用佐佢啦。


咁就用粟米粉同面粉,整一個粟米饅頭啦。。。



我初時總擔心加佐粟米粉會唔會發唔起。



 


不過好彩,都發得到。。。。



 


個粟米係有粒粒口感㗎,唔係磨得好幼,所以算係粗糧嘅一種,上網查過,北方人整「窩窩頭」嘅果種面食,就係用依種粟米粉整出嚟㗎,不過我未食過窩窩頭,唔識整。。。


依隻粟米饅頭,第二日嘅早餐。。。。


不過,真係好怪嘅口感。。。粗粗硬硬嘅。。。。


 



 


 


 


 


 


清爽一夏---凉拌手制凉面(食谱)

依排不停玩面食,覺得面粉真係好好嘢,好好玩。無論點玩,都可以整到唔同嘅嘢出嚟。


睇下尋日晏畫我又將面粉點樣玩。。。


我純屬係自己亂咁嚟玩㗎,估唔到又玩得幾好幾開心。


材料:(一人份)


低筋面粉100g、澄粉10g  、粟粉20g、水150g、鹽一細匙


將所有材料撈勻


 



 


撈勻之後係呈可流動狀嘅粉漿。


咁搵一個硬身D嘅保鮮袋,將粉漿倒入去。



 


睇下,就係咁嘅樣啦。


然後,將袋嘅角角位,剪一個好細好細嘅洞仔。



 


煲滾一煲水,最好用易潔鑊。


將上個步驟嘅粉漿,擠落水度。。。


咁滾二下,個粉漿就熟佐,而且定佐形。。。


撈起,過一過凍水。。。。


就變成佐一條條嘅涼面啦。。。。


係咪好易咧。。。。


又唔使搓面,又唔使醒面,乜都唔使,因為面粉本身無乜彈性,所以落佐澄粉同生粉去將面身搞硬。。。食起上黎有一种好爽好彈牙嘅口感。。。。


而且整好嘅涼面,係少少透明㗎,睇到都知好爽啦。。。



 


用韓國大醬煮切碎嘅五花腩,整佐一款醬肉絲,香噴噴,好惹味。。。



 


整好嘅涼面,食之前擺入雪櫃雪一雪佢,等佢口感更好


食嘅時候,用少少蒜蓉、青瓜絲、辣椒醬、醬肉絲、同埋最緊要嘅「涼拌汁」撈埋一起食。。。


酸咪咪,香噴噴,爽滑滑,勁好食。。。


(直情我覺得可以擺入餐廳做一款面食,都絕對有客回頭㗎)



 


個涼拌汁香港買唔到,我又就嚟食完啦,睇怕又要上一次深圳,買返幾支擺定,天熱,整涼拌,用佢真係好方便。。。



 


老公唔鐘意食依類干身嘅面食,所以我另外用雞湯煮佐一個伊面俾佢,又係簡單地配個醬肉絲同青瓜絲。。。。


我就覺得伊面湯食麻麻,不過老公鐘意,咪得羅。。。



 


29 7月, 2009

天熱一煲面搞掂---蕃茄煨伊面

尋日買佐一舊伊面返黎,真係好鬼大份。。。。


天熱無論係煮定係食都無乜太大興致,所以簡單地,煮個面仔大家食最就適合。


通常係街食飯都會食到芝士龍蝦焗伊面或者糖醋伊面果類睇落好唔簡單嘅款式。


咁自己係屋企食,一黎唔想整得咁複雜,二來只想食到普通家常簡單地食材。


譬如蕃茄啊豆角啊依類當季又開胃嘅食物。


所以尋晚嘅晚餐,就用佐最平常嘅食材去煮伊面。



 


伊面經過油泡過,我只需要略略拖拖水去將佢軟散出黎,方便我陣間去燜佢。


煮滾一煲水,因為太大份,一份一份放落去拖水,唔需要太耐㗎,幾秒鐘睇佢一變腍就撈起過凍水。


無睇伊面好似大大份,其實一遇水,就即刻縮到細一細。


尋晚我就煮佐二塊伊面。



 


二塊伊面,都係一細細盤仔,因為配料較多,所以二塊伊面都足夠。準備多一細碗仔雞湯。



 


配菜方面其實上係屋企有乜就落乜,不過蕃茄同豆角我係必落㗎,因為同面一起個味好夾,而且會酸咪咪,好開胃。



 


再整多D五花腩用豉油糖果D醃好佢。切少少薑絲同蔥段。



 


基本上係分開咁炒熟所有材料,最后再撈埋一起。



 


然後將伊面倒入去,淋上雞湯。撈勻佢地,蓋埋蓋焗幾分鐘。


 



 


然后開大火,炒至收汁干身。。。


伊面本身經過油炸之後,面身好鬆散,所以好易吸收到菜嘅味道。咁樣炒好嘅面,有肉有菜有面,一煲基本上搞掂一餐啦。。。。



 


酸酸香香嘅蕃茄豆角煨伊面,就搞掂拉。。


夏天食好開胃,夠簡單。。。



 


 


28 7月, 2009

醒神早餐之---自製豆沙包+豆漿(食譜)

始終我覺得中式嘅食物最能長久地吸引我。


無論係早中晚餐都係咁。


老公好耐無出街食過早餐羅,都係我提早一日準備定材料,第二日好快手咁整俾佢食過先至返工。


而早餐黎講,整包包係整得比較多㗎,因為包包嘅品種好多,可以成個月都唔同款㗎。


而且包包可以提早一日整好,第二日早上只要蒸返熱佢就食得。


食佐幾次肉包,尋日諗住整D甜包俾佢。


我整包好徹底㗎,連餡都係自己整先叫好玩嘛。


一杯紅豆,用少少水,快速煲煮到腍,倒入易潔鑊度,加黑糖適量,加豬油一大匙。


開中火,係咁炒,炒到干身,個紅豆餡就整好啦。


一定要落豬油,咁個豆沙餡先至會甘香。。。。


街買果D落得豬油太多,食起上黎好流,自己整可以控制甜度同油膩程度,加埋無落防腐劑,健康好多好多。。。。



睇下,炒得幾分鐘就干身啦。。。



 


攤凍之後,就用得啦~



 


整包都係果幾樣材料啦,面粉,油,酵母,白糖。


搓好之後發酵。


如果唔明,可以睇返我之前整饅頭嘅步驟,基本上整饅頭同整包都係一樣樣嘅步驟,區別在於最后會包餡入去就變成為包包。


如有不明,可參考依個網址:饅頭詳細製作過程



 


將面團搓成一個圓片,包入豆沙餡。



 


然后包好個口,我整包整得越黎越似樣啦。。。


不過甜包通常我唔會有花紋,咁樣做只不過係收口,收好口之後嘅包包,掉轉個頭,將光滑果面擺係上邊。



 


擺上蒸架



 


蒸十七八分鐘度。熄火,焗多十分鐘。



 


新鮮嘅豆沙包出籠啦。。。



 


自己新鮮制嘅豆沙餡,係香好多好多㗎。。。。


而且個包身又夠鬆軟,又香又綿嘅豆沙包。。。


人見人愛~~



 


豆漿其實真係好易好易整嘅一樣嘢嚟,我直情係早上要飲之前先至新鮮整㗎。


我就唔係用豆漿機整豆漿,係,豆漿機整係方便好多,但係因為黃豆本身就有一種腥味,如果煮得不夠透,飲起上黎會好重豆腥而少佐豆漿就有嘅香味。豆漿機未知係未溫度達唔到100度或以上咧?飲過用豆漿機整出黎嘅豆漿,都係有一陣豆腥味,而且隔渣都未算得好徹底,會飲到若隱若現嘅豆渣,無咁滑。


所以基本上我認為,如果想食到真正美味嘅食物,做多少少工夫,真係必要㗎。。。。


夜晚瞓覺之前,將黃豆一杯浸住水過夜。


第二日早上,將浸好嘅黃豆,以一碗豆,六碗水嘅比例,擺入攪拌機度,攪到碎,出曬味。。。


其實攪拌機真係無需要買太多功能果D,簡簡單單,可以做到干濕兩樣攪碎方式就已經足夠。個功率要夠大,咁個馬達先至無咁易壞。平平地,三百幾蚊果D已足夠家庭使用。


(如果要攪沙冰,就一定要買貴果D,如果普通嘅,攪沙冰攪得幾次就壞機啦)



 


然后將打好嘅豆漿水,用隔佈隔多二次,徹底地隔佐豆渣。



 


隔出黎嘅豆渣可以加鹽加面粉加蔥煎成餅仔又得,不過我有包包做早餐,基本上豆渣都係無乜用啦。



 


然后將隔佐渣嘅豆漿,搵一個高D深D,個底厚D嘅煲去煲滾佢。


我通常會滾三次咁多,即係滾佐之后熄細火,然后再開大火滾,咁樣重複三次。咁就包唔會再有豆腥味。。。。


豆漿好輕身,煲嘅時候唔好行開,要睇住火,無俾佢滾瀉出黎。。。


不過我用快速煲,唔用蓋咁煲,煲身較深,所以點滾都滾唔到瀉出黎。。。。


煲好熄佐火之後再落砂糖,咁,一杯新鮮自制豆漿,話咁易就搞掂啦。。。。。



 


如果想飲其它味道,咁,落多二塊朱古力落去。。。



 


就變成朱古力豆奶啦。。。。



 


一日之計在於晨,晨早咁樣一杯新鮮豆漿,加埋二個軟綿綿嘅豆沙包,咁就成身都充滿住力量啦。。。。


27 7月, 2009

自製PITA包配印尼串燒(食譜)

嘉頓眾多面包產品當中,有一款PITA BREAD,我從來無買過黎食.因為依隻PITA包,其實自己如果要係屋企製作,真係話咁易.


PITA包係中東地區嘅一款主食,佢哋會係包入邊夾雜自己鐘意嘅食品進食,咁如果我自己食,會配以合適自己味道嘅餡料去配搭.尋晚係屋企燒肉食,咁就整佐幾隻PITA包黎配食.


下圖係整好之後嘅樣,我鐘意食香口哋嘅,所以就專登焗得佢黃黃地,香脆哋....


配上印尼燒豬肉,幾片青瓜,少少金針菇,搭以印尼沙嗲醬~~~



 


整PITA包真係話咁易,普通中筋面粉,落少少糖,發酵粉,牛奶,去搓好個面團,然后擺半個鐘等佢發酵完成.(我求其落D量,無特別計過)



 


將發酵完成嘅面團,分成幾份,我隨意用手分成幾團,將佢哋搓圓,係個底收口,唔好有空隙.



 


然后壓成一塊塊薄嘅圓塊,用少少生粉做手粉撲係餅面,擺住十五分鐘等佢鬆馳



 


跟住焗爐250度預熱之後,再轉到200度,擺個餅仔入去焗.


三四分鐘之後,個餅仔就自己好似下圖咁脹大了....


如果喜歡食口感軟D,一見到佢脹大就可以取出,喜歡香口D就焗耐少少....


羅出黎凍佐之后,包入邊嘅空氣會走出黎,咁就會係包之中形成一個空間,對半切開之后,就形成一個個袋咁嘅樣,依個時候,就可以隨意係中間擺落自己鐘意嘅食物進食啦.



 


我提早一晚已經切好D肉醃好味,整嘅係印尼風味嘅燒肉.


醃料有:"干蔥剁碎,香茅剁碎,黃薑粉一細匙,芫莤籽粉二大匙,豉油,糖"


醃一晚,咁就最入味啦.



 


另外再燒多少少金針菇配食.



 


咁個PITA包嘅餡就完成了...


青瓜,金針菇,燒肉.


所有材料塞入包內就食得...



 


醃佐七隻雞亦做小食,雞亦同醃豬肉嘅醃料係一樣㗎,都勁香....



 


睇下,一餐富有異國風味嘅晚餐~~~



 


豬肉除佐配PITA包嘅之外,強哥鐘意一串串咁食喎,咁佢自己就串佐幾串嚟食.



 


依次燒肉,肉係佢自己切,佢自己串,自己燒㗎,真係串得幾好,串到好似出邊餐廳咁喎....



 


再睇多眼,真係好好味㗎.....