小菲菲俠自煮樂

31 5月, 2009

慳家師奶之-----16蚊煮兩餸一湯

今晚五點半同老公行完街街返到黎,休息下,食下雪糕,六點一個字開始開工煮飯仔。

1,先洗米煲飯,因為所需時間較長。

2,然后洗韭黃同埋芫莤,韭黃乾淨過芫莤,先過一次韭黃,撈起,再落芫莤繼續洗去沙塵,然后再洗多兩次韭黃,芫莤跟住過乾淨水,一次過搞掂兩味菜,慳時間慳水。。。

3,跟手開針板,切脆肉瓜同埋配脆肉瓜既蔥頭,切好野,洗乾淨針板收起,又處理好一味菜。

4,將免治豬肉撈入豉油糖生粉水醃好味。

5,將兩隻蛋打散

五個步驟,二十分鐘,處理好所有要煮既餸菜。

今日晚餐價格:韭黃一紮3蚊、豆腐一舊2蚊、脆肉瓜四蚊份有兩條今晚用一條2蚊、芫莤兩紮2蚊、雞蛋兩個2蚊、免治豬肉買佐十蚊用佐一半當5蚊。

合計:16蚊

入貨地點:旺角街市



 


先用瓦煲仔滾個清清地既芫莤豆腐湯,煲好直接可以上台,少洗一次鑊。
因為煲仔保暖性好,所以先滾好湯,再炒其它餸。

煮法:凍水落幾片薑同豆腐以及一粒雞精,煮滾之後將醃好入味既肉碎落入湯度滾一滾,熄火之前落曬所有芫莤,搞掂。。。。

一味極清甜又易搞既滾湯。



 


滾湯既同時,可以先炒起個韭黃炒雞蛋,雪櫃有食凈既兩片餐肉,切埋條,同韭黃又炒埋一碟,清埋佢。


 



 


最后炒埋個脆肉瓜,一份豬肉,一半滾佐湯,另一半配依味餸,剛剛好。。。。

加埋兩匙欖菜入去,惹味。。。。



 


滾一個湯,炒兩味餸,加埋影像,合共需時都係二十分鐘度。。。。。

餸菜湯搞掂,飯都剛剛好跳製,一個晚餐,就咁搞掂。。。。

好唔好味?

你話咧。。。。。

四十五分鐘,16蚊,電視汁撈飯,開定個冷氣,使乜出街食咁搵笨。。。。。。



 


 


 


 


 





 


26 5月, 2009

無肉不歡之---奇奇怪怪味鴨(食譜)

依日買佐舊冬瓜,我問檔主點解個皮有陣白色既粉既?


檔主就話,係依隻冬瓜既品種就係咁樣,生出黎就天生帶有咁樣一層粉,話依隻冬瓜味道正過普通黑皮果D,咁就買佐斤黎試下咁羅。


 



 


加佐瑤柱雲腿意仁紅蘿蔔脊骨煲啖湯。


好清甜。。。。。


不過感覺得到個冬瓜係清甜過黑色皮果D,我腍煲湯既話,兩种冬瓜煲湯都無乜分別,不過如果係用來炒,依隻帶白色粉沫既冬瓜會好味D。。。。



 


依日買佐盒鴨胸肉來試玩下。


曾食過一味四川菜,就係用鴨黎整,個味好特別,好濃郁既花椒味,依次就自己試玩下,睇下整唔整到果種味道。


材料「鴨胸肉切塊、薑、芫莤、蒜子、八角一粒、香葉一塊、花椒同辣椒干適量」


 



 


通常脂肪厚既肉類,我都唔會落一滴油落去,通常直接擺入鑊里,慢慢煎一陣間就會逼好多油出黎。


所以依味怪味鴨,我就先將鴨皮往下,煎出香味,然后將薑同蒜子倒入去爆香。(依步我漏佐一步,應該倒少少花椒入去爆出香味,用油爆過同未爆過既花椒味道都可以爭好遠)



 


睇下,完全無落油架,自己出佐几多油。。。


倒佐成碗鴨油出黎。。。。



 


然后倒豉油糖炒上色,,加水,將花椒辣椒八角香葉裝入鹵水袋度掉入去一起煲。



 


收汁之前,倒入大量香香菜,裝碟。。。。。



 


個味雖然同出邊所食係有D 唔同,唔知人D落佐乜香料落去,又會香得咁交關,不過我咁樣整出黎既鴨肉,一點膻味都無,而且勁惹味,如果唔用酒樓果隻為標準,我咁樣整既依味「所謂怪味鴨」都好正架啦。。。。



 


依晚青菜方面,用馬拉盞炒莧菜,依次整既馬拉盞辣佐少少,不過落佐好多瑤柱同蝦米,所以勁香。。。。


又係好惹味既一味餸。。。。



 


係咁多。。。。


 


25 5月, 2009

精美小點心之---斑蘭糯米糍(食譜)

尋晚睇電視,一檔飲食節目介紹到依味東南亞小食,即刻引起我肚內至為食既果一條蟲蟲,係咁對住我個心臟話:好想食啊,好想食啊。。。。


咁今日即刻動手整佐幾粒出黎安慰下果條蟲蟲。


材料與作法:


糯米粉適量,斑蘭油二滴(可於印尼商店買到),滾水少少。


基本上我唔知個粉同水既量,係咁求其倒入去搓,唔好一下落得太多水,慢慢落,慢慢搓,水多就再加D粉,水少就加D水。


 


我係用滾水同埋生水一半一半黎開個粉,因為糯米粉如果用凍水開就唔會有一种粘性,用滾水倒入粉度,可以碌熟一部份粉,咁就可以產生粘性,另一小部份既粉就用普通凍水黎開,依种用滾水同凍水開出黎既粉就叫「生熟粉」啦。


 



 


將成份糯米粉搓成一個粉團,靜置十幾分鐘度,等個粉同水互相溝通下。


落佐斑蘭油既粉團,變成淡淡既綠色,好靚啊。。。。


斑蘭油係由一种叫斑蘭葉既植物榨汁得黎,佢帶有一陣若隱若現既椰香味,係東南亞小食入邊比較常見到既純天然色素材料。



 


餡既方面,我就用佐椰絲,黑糖,花生碎黎整。



 


好啦,粉團靜置之后可以用啦。將粉團分成一舊舊,隨個人鐘意大細,然后壓扁個粉團,再用手慢慢壓開壓扁,形成一個粉片。



 


然后將準備好既餡包入去,再捏實個封口,搓成一粒粒圓形。



 


心血來潮之下既成品,幾粒仔咋。。。。。



 


跟住煲滾一煲水,將整好既粉團掉落水度煮,一見浮起就可以撈起啦。



 


基本上二分鐘左右就煮熟佐個粉圓,一浮起就可以認為佢熟佐。



 


然后將煮好既粉圓,係椰絲上邊滾一滾。。。。



 


超級簡單既一個斑蘭糯米糍就咁搞掂啦。。。。



 


素質絕對可比美出邊所售。。。。。



 


有個人仔,忍唔住手,要偷食啦。。。。。



 


咬一啖睇下。。。。


內餡與外層既椰絲相相呼應,中層帶有淡淡斑蘭香味既糯米咬起煙煙韌韌,咁樣一味小食,又簡單又好味,大家都應該嘗試下。。。


 



 


無肉不歡之---孜然焗寸骨(食譜)

周末的兩日,稀裏嘩啦地下足兩日兩夜地雨。


閑賦家中的最佳娛樂,不外乎即經濟又實際的一個節目“看影碟”


好的電影即便過了再多年看來,依然能夠滋味無窮。


今天翻看舊電影,看了“修女也瘋狂、這個殺手不太冷、頭文字D”


都是非常經典的電影,特別是以藍光碟看來,更是精彩再添多了三分。


看電影與吃飯一樣,若能與誌同道合者一同做來,份外地能夠讓人身心更愉快。


無疑強哥就是我的那個“誌同道合者”。


無它,也只有我倆個才會對好看的電影一再地翻看,並且能夠在看的過程喋喋不休於導演對於鏡頭的使用,角度的拿捏,編劇對白的精辟,道具的功力,演員的表現,一切一切都足夠說上大半天,非常地過癮。


於吃飯一事,能夠一起對著素食愁眉苦臉,一起對著肉食笑靨如花,除他之外,再無旁人。


這日買來一盒豬寸骨,不為別的,只是因為它長得實在好看。


整齊地長著根根的細骨頭,卻能夠如此的肉感十足,實屬不易。


簡單地用醬油,糖,孜然粉辣椒粉醃入味。



 


為免纖細地脆弱的骨頭在烹制過程過早地折斷,加上錫制外衣一件



 


然後入焗爐,一百八十度火烤二十五分鐘。



 


出爐前再落多把孜然辣椒粉,裝碟`~



 


香艷誘人。。。。


孜然烤寸骨。。。。



 



外香裏嫩,嫩出了汁。。。。


索~~



 


雪櫃剩有半邊南瓜,取出切塊,加大量的蒜頭,還有半罐中午煮面吃剩的罐頭五香肉丁一起,炒做一碟。。。


 


今日食起罐頭,尤其地有犯罪感。。。。


不關防腐劑的關系,早已視生命為等閑(若為肉食故),而係因為罐頭的價格實在地貴,若非味道喜人,買新鮮肉來更為實惠,因此,食起罐頭,非常地有犯罪感,何不食新鮮。。。。


 



 


飯後甜品,沒有龜的苓膏一碗。。。



 


 


 


22 5月, 2009

美味住家餸---豉汁南瓜燜排骨

早輪係網上睇到依味餸菜,從來未食過用南瓜配排骨,而南瓜又係我好鐘意既一種食物,所以依日就買返黎試下個味道如何。


因為無食譜,係自己想當然地做法。


材料如下:


南瓜半邊、排骨一磅、蔥切段、薑、豆豉、蒜蓉剁蓉。



 


作法:1,熱鑊落油,將薑蓉、豆豉、蒜蓉,蔥白落鑊爆香



 


2,倒入排骨,落生抽老抽糖較味,炒上色。



 


3,落南瓜,加水燜。



 


4,燜既過程最好唔要過多翻個南瓜,因為南瓜熟佐一番好易變碎,差唔多收汁之前再將餘下既蔥段扔落去,開大火收汁,裝碟~~



 


蒜蓉可以略大粒,略多D,因為南瓜同蒜頭既味道係可以好襯,依味餸菜,又好味又易送飯尼~~


 



我無乜點食飯,凈食佐好多南瓜,依家D南瓜好甜好香。。。。



 


另外煮多一個豆腐,無乜好講。。。。


俾我煮到碎佐D。。。。



 


依晚既兩味餸~~


 



 


-----------------------------------------------------


第二晚,用面豉煙肉煮芽菜,好送飯。。。。



 


食凈少少叉燒,加埋隻蛋,少少韭黃,又係一碟餸~~



 


依排好熱,都懶得整乜餸,求其炒兩味搞掂`~~



 


 


 


19 5月, 2009

美味住家菜---孜然羊仔排、煙熏鴨炒娃娃菜

早輪趁住總有少少涼意,買佐盒羊仔骨返黎食,實在太想念怪怪既羊膻加埋孜然之后果種獨一無二既香味。。。。。


提早一日買佐盒羊仔排,然后用豉油,少少糖,孜然粉,辣椒粉醃一晚。


 



 


第二日食之前,用平底鑊慢慢火,唔使落油,慢慢煎熟佢。


因為羊排本身已經有好豐富既油脂,所以稍稍煎佐一陣之後已經有好多好多油標晒出黎。



煎到接近熟既時候,落洋蔥,紅蘿蔔絲大火炒一陣,熄火之前掉一大扎芫莤同孜然粉落去,熄火,炒勻,裝碟~~~


香到閉~~~



 


買佐包煙鴨胸肉,因為一直嫌鴨肉本身已經好膻(鴨膻比之羊膻難頂好多),所以基本上無買過煙熏既鴨肉黎食,以前好似買過一次黎食,不過已經唔記得羅,今次又買過一包試下個味如何。。。。



一包娃娃菜,幾片煙鴨胸肉,炒羊肉凈返少少紅蘿蔔絲,少少蒜子,咁樣炒做一碟。。。。



 


我先用鴨肉片爆香個鑊,然後倒入紅蘿蔔絲同蒜子爆香,最后再倒入娃娃菜炒熟。個鴨胸肉出佐好多油,所以依味送又係唔落油架。


果種煙熏味又真係幾香,令到個娃娃菜好有滋味,不過個鴨胸肉本身我就麻麻鐘意食, 所以睇怕凈低果大半舊鴨胸肉,都係做配菜要個味算羅。



 


再加埋隔夜湯一煲。。。。


美味一個晚餐就係咁。。。。


 



 


-------------------------------------------------------


第二日,整佐煲娃娃菜粉絲濃湯寶湯。


 



 


之前一晚,因為唔想一次食咁多羊肉,所以留佐幾舊出黎未煮,留待下一晚,起佐羊肉,同樣用豉油孜然粉醃入味,然后加大量紅蘿蔔絲,少少洋蔥,又炒埋一大碟。


同之前一晚,羊肉係主角,紅蘿蔔係配角一樣咁既材料,只不過主角身份調轉佐。。。。


原來都好好味啵。。。。



 


炒多一個蒜蓉菜芯。。。



搞掂~~~