小菲菲俠自煮樂

28 11月, 2008

呷炒米嗲

其實係潮州話,轉成正常文字應該係「食炒米茶」


娘親祖籍潮州,雖然從未回過鄉下,但是自小家中皆以潮州話溝通。


耳濡目染之下,對於潮州話或潮州食物,都可以說得出二三味。


昨日炸了一碟花生,突然想起潮州的一种小吃「炒米茶」,在街市買了一扎九層塔,自己在家里做了一個簡易版的炒米茶食。


至於炒米,今日還會自己製作的怕是很少,少時婆婆總是將米飯煮熟之后晒干,然后再將晒干的米飯凈鑊炒至膨脹。


如果叫我自行製作,寧肯不吃也罷,幸好早前在一間舖頭仔買到由潮州出產的炒好的米。


昨日利用簡單的材料,做了一個簡易版的炒米茶,一過口癮。


炒米與花生~



九層塔



洗凈之后剁碎,加豬油與鹽炒出香味,鹽可能落多少少,因為過后需要浸落茶水度進食。



係娘親幫我自己提練佐細細一樽豬油,非特殊食材或者特別需要,我都唔捨得取出使用,來之不易啊。。。



既然叫做炒米茶,當然離不開一個茶水啦~~


我就簡單的用茶包衝做一碗濃茶,紅茶。



然后將所有材料撈入茶水度,就食得啦~~


炒米吸收佐紅茶的茶香,伴以花生香香脆脆的口感,帶著九層塔獨有的異香,喜歡的人,難以抗拒~~



---------------------------------------------------------------


晚餐,尋晚煲佐淮山當歸豬骨湯,加佐少少生薏米,去濕~~


買0既係大骨,我好鐘意吮入邊的骨髓,大骨煲湯又夠濃,我鐘意~



青椒炒牛肉。。。。



蒜蓉炒皇帝菜。。。



好味而豐富的一餐~~



27 11月, 2008

快餐---焗豬扒飯、罐頭湯

尋日懶筋發作,邊度都唔去,餸都係係樓下惠康買上黎,平日我好少係超市買餸,一黎D菜無街市咁新鮮同埋選擇唔多兼且價格貴,二黎我成日係屋企都需要外出行行下見下個太陽吸收下個地氣,加上一入到超市點都會買多佐D唔等駛既野返黎。


尋日買佐一包天婦羅炸粉,依個就唔係亂買野啦,以前成日同相公去食日本野,佢至鐘意食天婦羅,買一包返黎,得閒試整下,睇下自己炸出黎既效果會唔會同出邊既一樣~~~



我記性自細就好差,所以D粉入好袋之后,為免第日唔記得係乜野,通常我都會直接將包裝剪落黎再痴返個密實袋面度,背面再寫埋有效日期,咁就包保唔會唔記得啦~~


我屋企所有一時之間開佐又唔會用晒既食物,買返黎我就會入袋或者樽度,睇落整齊劃一D~~



超市可選擇的食物唔係好多,買佐一盒帶骨豬扒,盛惠$20.8蚊,有三塊咁多~~


都幾厚身,愛黎整豬扒飯就一流啦~~~



 


做法以前講過,就唔多寫啦,一人一大碟酸味味,香噴噴既豬扒飯撈電視汁,正`~~


 



買佐幾個罐頭湯返黎,懶起上黎都可以救下命~~~



尋晚一個焗飯,配埋一個罐頭湯~~


係咁簡單~~



炸完豬扒順便趁油熱,炸埋一碗仔花生,加少少鹽同埋砂糖撈埋,香口~~



 


 


26 11月, 2008

營養晚餐---菜湯、梅菜蒸肉餅、XO醬炒椰菜

其實一直知道自己的飲食習慣與健康理念總是背道而馳,可惜理智總是無法戰勝胃口的需要,经常是燉了豬腳再食大肥叉,時時告訴自己,明天開始食得清淡些也不遲。只是明日復明日,明日來得姍姍遲,食的依舊是香口或肥膩的食物。
睇著自己與強哥日漸龐大的身軀,實在改變飲食習慣已是刻不容緩,因此尋日晚餐,相較以前,稍稍營養少少~~多菜少肉~~


係一個BLOG度學到整依味湯水,材料簡單得黎,原黎幾好味~~


我用佐「蕃茄二個,薯仔一個,椰菜適量,甘筍一條,肉片適量」



簡單的滾佐半個鐘,成煲湯已經好濃,維它命全部都融入水度啦~



通常去開果間豬肉檔買肉,實在太了解果個豬肉佬的生意手法,如果我心入邊打算買十五蚊豬肉,咁就直接同豬肉佬話「俾十蚊梅頭肉我」,咁通常佢都會割十三四蚊出黎~~


尋日買佐十三蚊豬肉,割佐一細舊仔出黎切片,滾湯時用佐,剩低果D剁碎,同梅菜蒸做一個梅菜蒸肉餅~~


梅菜蒸肉餅,永遠都係咁好味`~~



煲湯用佐少少椰菜,剩低果D愛黎炒做一碟,拍幾粒蒜頭,用少少甘筍切絲加入去一起炒,再加一大匙XO醬,咁,色香味,俱全矣~~



一餐我睇黎幾營養的晚餐~~



25 11月, 2008

家常便飯

尋晚返去奶奶度食晚飯,都係家常便飯,無乜好介紹,直接上圖片~


1,奶奶自己打的魚膠,讓入矮瓜同青椒度。



2,打完魚膠剩低的魚皮愛黎炸魚皮~香到閉~~



 


3,無乜驚喜的蒸蟹~



5,果皮油鹽水煮泥猛~`



 


6,翠肉瓜炒雜菜~



係咁多~~



22 11月, 2008

梅菜蒸魚腩、XO醬韭黃炒蛋、紫菜魚餃湯

天氣凍凍地,個人的胃口都變得好開,尋晚整佐幾味比較惹味的餸菜俾強哥食,等佢肚仔餓餓之時,食到咁樣惹味的飯餸,會有幸福的感覺`~


老爺釣到一條八斤重的鱸魚,俾佐一舊好大舊的魚腩俾我,最滑的魚腩當然係愛黎蒸最適宜啦,考慮到強哥至愛梅菜,所以蒸魚腩就用佐梅菜去蒸。


如果想梅菜蒸出黎再香D,可以先將梅菜剁碎之后,落油、蠔油、糖去炒出香味。



跟住將炒香的梅菜擺響魚腩上面,上鑊猛火蒸八分鐘即可~~



因為已經炒香佐梅菜,有足夠的味道,蒸的過程梅菜的汁滲入到底下的魚度,蒸好之后無需再落豉油或者熟油咁啦,直接上台食得~~


魚肉又滑,D梅菜又香,真係勁惹味啊~~



早幾日又整佐一樽XO醬,唔係自誇,我整的XO醬食過都話正~~試過去朋友屋企食飯,整佐一樽再包裝得靚靚送俾人,人D總以為係我係出邊買的貴野添~~~


今晚簡單的韭黃炒蛋,落佐一匙XO醬入去,即刻變身為艷麗佳人~~


清甜得黎,帶有另一种鮮香惹味的感覺,下次屋企有客食飯,炒咁樣的一碟餸出黎,包保人人歡迎~~



懶得出街買湯料,又想係凍凍的夜晚可以俾強哥飲一啖暖笠笠的湯水,抄個雪櫃睇到最后一小扎的紫菜,咁就用一個濃湯寶做湯底,加紫菜同埋幾個打邊爐剩低的幾個魚皮餃落去,熄火之后加幾滴香油同埋蔥花落去~~


原來都可以好好味架~~~



屋企都係阿強哥做裝飯的工作,我係廚房影像的時候,突然聽到佢大叫一聲「哇」~~


原來佢睇到飯煲和邊的臘腸仔~~



因為想食XO醬炒飯,所以尋晚得登煮多二杯米,落幾條臘腸聽日可以炒飯食,今晚就一人一條仔過下癮先~~~


睇下,簡簡單單的兩餸一湯~~


 



 


 


21 11月, 2008

紅色大蘿蔔、牛肉炒芥蘭、牛蒡骨頭湯

朋友送佐一個蘿蔔俾我,切開睇下,好特別啊,出邊係綠色,入邊係好靚的粉紅色來架~~


依種係北方的一個蘿蔔品種,香港我未見過,我叫佢「花心大蘿蔔」~~~



唔知點食,就切佐一條香腸同佢一起炒



原來除佐個樣同白色蘿蔔唔同,基本上果種辛辣的蘿蔔味大家都係好接近,同埋依種花心大蘿蔔較之白色果D又再脆D啵~~


我鐘意食蘿蔔,所以咁樣既小炒蘿蔔,我鐘意~~



 


另外買佐牛肉,簡單地用薑絲豉油糖生粉撈勻,最后再淋二大匙的油醃一醃佢~



牛肉其實同芥蘭味係好格架,咁樣炒做一碟,好送飯~~


我炒既牛肉幾時都係咁滑咁嫩架~~~


至憎餐廳用蘇打粉拉過D肉,搞到一D牛肉味都無,食落似綿花,核突到死,自家炒食落無論係口感或者味道都充滿活力~~



買佐一截日本牛蒡,本來係想切絲之后涼拌食,睇到雪櫃有一舊粟米幾條紅蘿蔔,又再走去超市買佐一盒豬骨返黎,煲佐一個湯水潤下~~


牛蒡多食有益架,愛黎煲湯另外會有一種淡淡樹木的味道,我煲依個湯凈係落佐「甜粟米一條,紅蘿蔔一條,牛蒡一條,豬骨一盒,紅棗幾粒」係咁多。。。。


好清潤的一碗湯~~



兩公婆簡單的兩餸一湯~~



14 11月, 2008

自家制---糖醋小物、豉椒炒鮮魷

冬天正是食蘿蔔的大好時節,今日係街市買佐一條巨型大蘿蔔。


唔係愛黎煲湯,亦都唔係燜牛腩,而係正一味酸咪咪,甜滋滋的甜醋蘿蔔。


做法簡單得黎,味道一流~~


準備一個乾淨的玻璃樽,將蘿蔔切片,擺入樽度,跟住準備一個碗仔,倒半碗仔白醋,加半半碗白砂糖,幾粒辣椒干,撈勻之后直接倒入蘿蔔片度,蓋埋蓋,一日之后就食得啦。。。



其實越薄食的越快,我另外留佐半舊蘿蔔,切成薄絲,加埋半條甘筍切埋絲,跟住又係用同樣的糖醋醬汁撈進入,醃一個鐘度就食得啦。。。



食之前撈埋少少芫莤,開胃。。。



尋晚本來三叔話埋要過黎,所以預多一個餸,點知要開工黎唔到,所以尋晚凈返一個鮮魷今日先至煮黎食。


鮮魷切好之后走一走油。



跟住準備「豆豉醬(豆豉剁碎之后加豉油加糖加少少紹酒煮成)、薑蓉蒜蓉、青紅椒」



一碟惹味之極的豉椒炒鮮魷~~



飯又係尋晚食凈果D,加埋一碟仔食凈的花生豬手,今晚搞掂晒所有餸菜,聽日周末可以安心出街食正野啦~~



自家食---四喜烤夫,讓茶葉蛋

尋晚奶奶同四叔去佐醫院探婆婆,離我依度唔係好遠,就打佐電話叫佢地探完之后過黎我度食飯。


基本上學識煮飯仔之后,我未點試過煮俾強哥以外的人食過,所以尋晚煮飯都驚驚地,佢地食唔慣我D餸架,不過已經叫得來羅,點都要試煮一餐出黎啦~~


係街市豆腐檔買佐一舊「烤夫」,其實烤夫同豆腐完全唔係一回事,不過多數都可以係豆腐檔搵到啵。。。。


其實如果記得我之前整「涼皮」的食譜,入邊洗出來的面筋經發酵之后再蒸熟就係依款「烤夫」啦!



我尋晚整佐上海比較出名的家常菜「四喜烤夫」


整依味餸首先要處理好烤夫,因為佢係經發酵而成,必定帶有酸味,所以買佐烤夫之后,首先要將烤夫用手撕扯成一舊舊仔,最好不要用刀切,因為刀切的邊緣會變實,變實佐炒的時候就唔會入味,所以對於烤夫的處理,第一,撕成一舊舊,第二,落鹽醃一個鐘,第三,出一出水,輕輕拖一拖水就得,咁樣做係令到個烤夫的酸度減低。


而「四喜烤夫」的四喜我就用佐「香菇,金針,木耳,花生」



做法:


1,準備一碗仔醬汁,豉油加糖較成。


2,先將四喜炒出香味,跟住倒入烤夫略略炒干身,最后倒入醬汁,加水略略料一陣,熄火之后加少少麻油炒勻即可裝碟~~


熱食無咁好食架,所以我預早炒好,攤凍之后晚上上台食得~~


奶奶同四叔一路以為係我響街外買番黎架添,話好好味,聽到真係好心到我~~~


直到我話係自己整架,奶奶有少少唔信啵~~



因為無乜煮俾人D食的經驗,所以整佐一個比較唔會失手的鹵水雞亦同梅頭肉,雞翅出過水再過一過凍水之后,加水加生抽老抽加糖,再落埋薑同蔥,開火燜~~


舊梅頭肉就乜都唔洗理,洗干凈之后一起擺落水度燜。。。



越簡單的材料越好味架~~


后來食凈幾隻雞亦,俾奶奶帶佐返去第二日中餐煮公仔面配住食。。。



早一日整茶葉蛋凈返幾隻雞蛋,將雞蛋開邊,取出慢黃,買佐少少肉碎,加少少蛋黃,加香菇薑蔥加鹽調好味之后讓返蛋度,再蒸返十分鐘,搞掂(為佐節省時間,我係鹵雞亦的時候順便擺埋係鑊入邊蒸埋)


賣相又靚又好味~~



煲佐一煲好濃好濃好滑的新鮮淮山當歸煲雞湯。。。


奶奶飲到贊不絕口,真係有成就感~~



知道四叔鐘意香口野,炸定一袋蝦片俾佢帶返屋企。。。



最后烚埋一個芥蘭,自家人,簡單得黎好味至緊要~~~